ގަދަ 10އަށް ދަރިވަރުން ހޮވުމުގައި ބަލާނީ އޭޕްރިލް/މެއި އިމްތިހާނުގެ ނަތީޖާއަށް
އޭ ލެވެލް އިމްތިހާނުން ގަދަ 10އަށް ދަރިވަރުން ހޮވުމުގައާއި ޕްރެސިޑެންޝަލް ސްކޮލަރޝިޕް ދިނުމުގައި ބަލާނީ އޭޕްރިލް/މެއި އިމްތިހާނުގެ ނަތީޖާއަށް ކަމަށް އެޑިއުކޭޝަން މިނިސްޓްރީން ވިދާޅުވެއްޖެއެވެ.
އެޑިއުކޭޝަން މިނިސްޓްރީން މިއަދު ނެރުނު އިއުލާނެއްގައި ވިދާޅުވެފައި ވަނީ މިއަހަރުގެ އޮކްޓޯބަރ/ނޮވެމްބަރ ގައި އޭ ލެވެލް އިންތިހާނު ހަދަން ބޭނުންވާ ދަރިވަރުންނަށް އެ ފުރުސަތު ހުޅުވާލައިވާ ކަމަށެވެ.
މިއަހަރުގެ އޭޕްރިލް/މެއި ގައި ބޭއްވުމަށް ހަމަޖެހިފައިވާ އޭ ލެވެލް އަދި އޭ.އެސް ލެވެލް އިމްތިހާނުގައި ބައިވެރިވާން އެދިފައިވާ ގްރޭޑް 12 ގެ ދަރިވަރުންނަށް އެކުދިން ބޭނުންނަމަ މިހާރުގެ އެޕްލިކޭޝަން ވިތުޑްރޯ ކުރުމަށްފަހު މިއަހަރު އޮކްޓޫބަރ/ނޮވެމްބަރ ގައި އޮންނަ އޭ ލެވެލް އިމްތިހާނުގައި ބައިވެރިވުމުގެ ފުރުސަތު ހަމަޖައްސާފައިވާކަމަށް އެ އިއުލާނުގައި ވިދާޅުވެފައި ވެއެވެ.
ވިތުޑްރޯ ކުރާ ދަރިވަރުންނަށް ސްކޫލު ނަމުގައި އަލުން އިމްތިހާނުގައި ބައިވެރިވެވޭނެ ކަމަށާއި، އެގޮތަށް ވިތުޑްރޯ ކުރެވޭނީ އައި.އޭ.އެލް ގެ މާއްދާތަކުން އެކަނި ކަމަށް ވެސް އެމިނިސްޓްރީން ވިދާޅުވިއެވެ. އަދި، އެޗްއެސްސީ ހަދާ ދަރިވަރުންނަށް އެ އިމްތިހާނު މިހާރު ތާވަލު ކުރެވިފައިވާ ގޮތަށް ކުރިއަށް ދާނެ ކަމަށް ވެސް އެޑިއުކޭޝަނުން ވިދާޅުވިއެވެ.
ވިތުޑްރޯ ކުރަން ބޭނުންވާ ދަރިވަރުންގެ މައުލޫމާތު މިމަހުގެ 30ވަނަ ދުވަހުގެ 12:00ގެ ކުރިން އެދަރިވަރެއްގެ ސްކޫލު މެދުވެރިކޮށް ޑިޕާޓްމަންޓް އޮފް ޕަބްލިކް އެގްޒޭމިނޭޝަންސް އަށް އަންގަވާ ދެއްވުމަށް ވެސް އެޑިއުކޭޝަން މިނިސްޓްރީން އެދިލައްވައެވެ.
