3 މީހުންނާއެކު ދަތުރުކުރި ތެޔޮ އުފުލާ ބޯޓެއް އަޑިއަށް ދަނީ
ކަނޑުގަދަވެ، ހުޅުމާލޭ ދެވަނަ ފިޔަވައްސާއި ދިމާލުން ކަނޑުގެ ސަރަޙައްދުގައި ބޯޓެއް އަޑިއަށްދާތީ މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) މާލެ އޭރިއާ ކޯސްޓްގާޑް ސްކޮޑްރަންއިން ހަރަކާތްތެރިވާން ފަށައިފިއެވެ.
އެމްއެންޑީއެފްގެ ތަރުޖަމާނު މޭޖަރ އިބްރާހިމް އާޒިމް ވިދާޅުވީ އަޑިއަށް ދަނީ ތިން މީހުންނާއެކު ދަތުރުކުރި ތެޔޮ ބޯޓެއް ކަމަށެވެ.
މި ބޯޓުގައި ތިބި މީހުން ސަފާރީ އަކަށް ނަގާފައިވާ ކަމަށް ވެސް އެމްއެންޑީއެފުން މައުލޫމާތު ދެއެވެ.
މޫސުމާ ބެހޭ ގައުމީ އިދާރާއިން ވަނީ މި ދުވަސްވަރަކީ ރާއްޖެއަށް މޫސުން ގޯސް ކަނޑުގަދަ ދުވަސް ވަރެއްކަމަށް ލަފާކޮށް ރީނދޫ ސަމާލު ނެރެފައެވެ. މި އާއެކު ކަނޑު ދަތުރު ކުރުމުގައި ސަމާލުވުމަށް އެމްއެންޑީއެފުން ވަނީ އިލްތިމާސް ކުރައްވާފައެވެ.
ކަނޑު ދަތުރުފަތުރު ކުރައްވާ ފަރާތްތަކުން ، އެއްވެސް ހާދިސާއެއް ހިނގައިފިނަމަ، ލަސް ނުކުރައްވާ ކޯސްޓްގާޑުގެ ހިލޭ ގުޅޭ ނަންބަރު 191 އަށް ގުޅުއްވުމަށް އެމްއެންޑީއެފުން އެދިލައްވާފައި ވެއެވެ.
