ނައިފަރުގައި ކޮވިޑް ޓެސްޓު ކުރެވޭނޭ ވަޞީލަތް ވަގުތުން ޤާއިމްކުރަންޖެހޭ: ޝިޔާމް
ޅ.އަތޮޅު ހޮސްޕިޓަލުގައި ކޮވިޑް-19އަށް ޓެސްޓު ކުރެވޭނެ ވަޞީލަތް މިވަގުތު ނެތުމަކީ ވެސް މި ހާލަތުގައި އިތުރަށް ނުތަނަވަސް ކުރުވާ ކަމެއް ކަމަށް ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަޙުމަދު ޝިޔާމް ވިދާޅުވެއްޖެއެވެ.
ނައިފަރުގައި ކޮވިޑް-19 ފެތުރެމުން ދިޔުމާއެކު ކަންބޮޑުވުން ފާޅު ކުރައްވަމުން އިދިކޮޅު ޕީޕީއެމްގެ ނައިބު ރައީސް ވިދާޅުވީ ނައިފަރަކީ ވަރަށް ބޮޑަށް ތޮއްޖެހިގެން ޢާއިލާތައް ދިރިއުޅޭ ރަށަކަށް ވާ ހިނދު އެޗްޕީއޭ އިން މިފަދަ ޙާލަތްތަކުގައި ޢަމަލުކުރާ އާއްމު ގައިޑުލައިނަކީ ނައިފަރު ކަހަލަ ރަށަކަށް އެންމެ ރަނގަޅު ގައިޑުލައިންތޯ ވިސްނާލަން ޖެހޭ ކަމަށެވެ.
"ގެއަކުން ފައްސި ކޭސްއެއް ފެނިގެން ކޮންޓެކްޓް ޓްރޭސިން ހަދާއިރު މި އޮންނަނީ މުޅި ހިސާބުގެ ގެތަކު މީހުން އައިސޮލޭޝަނަށް ދާން ޖެހިފައި. ހުރިހާ ގެއެއް ޓޭޕްދަމާ މޮނިޓަރިންގަށް ލަމުން ދަނީ" ނައިފަރުގެ ހާލަތާމެދު ކަންބޮޑުވުން ފާޅު ކުރައްވާ ފޭސްބުކްގައި ޝިޔާމް ލިޔުއްވި ޕޯސްޓެއްގައި ވިދާޅުވެފައި ވެއެވެ.
މީގެއިތުރުން ޝިޔާމް ވިދާޅުވީ ނައިފަރުގެ ގޭބިސީއެއްގައި 15-10 މީހުން ދިރިއުޅޭއިރު މިގޮތަށް ތޮއްޖެހިގެން އާމްދަނީ ހޯދަން ކުރާ މަސައްކަތް ހުއްޓާލާ ތިބެން ޖެހުމުން ދިމާވާ މައްސަލަތައް މަދު ނޫން ކަމަށެވެ.
"މުއައްސަސާތަކުގައި މަސައްކަތް ކުރައްވަން ތިއްބެވި ފަރާތްތައް އެކީހެން އައިސޮލޭޝަނަށް ދާން ޖެހޭ ހިސާބަށް ދިއުމަކީ މިހާރު ނަތީޖާތައް އަންނަގޮތުން ދުރުގައިވާ ކަމެއް ނޫން. އެ ފަދަ ޙާލަތެއް މެދުވެރިވެއްޖެނަމަ މުޅިރަށް އެކީ ހުއްޓުމަކަށް އަތުވެދާނެ. މިވަގުތު ވެސް އެންމެ މުހިއްމު މުއައްސަސާތަކުގެ ގިނަ ޢަދަދެއްގެ ފަރާތްތަކެއް ވަނީ އައިސޮލޭޝަންގައި. ޅ.އަތޮޅު ހޮސްޕިޓަލުގައި ކޮވިޑް ޓެސްޓު ކުރެވޭނެ ވަޞީލަތް މިވަގުތު ނެތުމަކީ ވެސް މި ހާލަތު އިތުރަށް ނުތަނަވަސް ކުރުވާ ކަމެއް." މެމްބަރު ޝިޔާމް ވިދާޅުވިއެވެ.
ޝިޔާމް ވިދާޅުވީ، ކޮވިޑަށް ޓެސްޓު ކުރުމަށް ސާމްޕަލް ނަގައި ސާމްޕަލްގެ ނަތީޖާ ނުލިބި އެތައް ދުވަހެއް އިންތިޒާރު ކުރަން ޖެހުމަކީ ވަކިވަކި ފަރުދުން އަދި މުޖުތަމަޢު ނަފްސާނީ ހާސްކަމުން ބަލިކަށިކޮށްލާ ކަމެއް ކަމަށާއި އެއީ ރަށުގެ ޙަޤީގީ ޙާލަތު ދެނެގަތުމަށް އޮތް ވަރަށް ބޮޑު ގޮންޖެހުމެއް ކަމަށެވެ.
"އަޅުގަނޑު މިދަނީ ސަރުކާރުގެ ކަމާބެހޭ ފަރާތްތަކަށް ގުޅާ ޙާލަތު ބަޔާންކޮށްދީ އަދި ޙާލަތު ބަދަލު ކުރުމަށް ރަނގަޅު އަވަސް މަސައްކަތްތަކެއް ކޮށްދެއްވުމަށް އެދެމުން. އަދި މި ނޭވާގައި ވެސް ކަމާބެހޭ ފަރާތްތަކަށް ގޮވާލަން، ވީ އެންމެ އަވަސް އެންމެ ރަނގަޅު ފިޔަވަޅުތަކެއް މިކަމުގައި އަޅުއްވައިދެއްވަން." މެމްބަރު ޝިޔާމް ވިދާޅުވިއެވެ.
މީގެ އިތުރުން ޝިޔާމް ވިދާޅުވީ، ނައިފަރުގެ ހުރިހާ ގެއެއްގައި ޓޭޕް ދަމާ މޮނިޓަރިންގަށް ލައި ރަށުގެ ރައްޔިތުން ގޭބަންދުކޮށް ރައްޔިތުން ބިރުވެެރި ކަމެއްގެ ތެރޭގައި ބޭތިއްބުމަކީ ޙައްލެއް ނޫން ކަމުގައެވެ. އަދި މި ވަގުތު ނައިފަރަށް އެހީތެރިކަން އިންތިހާއަށް ބޭނުންވާކަން ވެސް އެމްޕީ ޝިޔާމް ފާހަގަ ކުރެއްވިއެވެ.
"ނައިފަރުގައި ކޮވިޑް ޓެސްޓު ކުރެވޭނޭ ވަޞީލަތް ވަގުތުން ޤާއިމް ކުރަން ޖެހޭ. ސިއްޙީ އިތުރު މަސައްކަތްތެރިން ބޭނުންވޭ. ތަންފީޒީ ޢިދާރާތަކުގެ އިންސާނީ ވަޞީލަތް އިތުރު ކުރަން ޖެހޭ" ޝިޔާމް ވިދާޅުވިއެވެ.
މި ޙައްސާސް ދަނޑިވަޅުގައި ނައިފަރުގެ ދަރުމަވެެރިންގެ ފަރާތުން ފެންނަނީ އާދަޔާ ޚިލާފް ޚިދުމަތްތެރި މަސައްކަތްތަކެއްކަން ވެސް ޝިޔާމް ފާހަގަ ކުރެއްވިއެވެ.
ޅ.އަތޮޅު ހޮސްޕިޓަލްގެ މެނޭޖަރު ބަދަލުކުރުމަށް ސިޔާމް ގޮވާނުލެއްވީ ކީއްވެތޯ؟
ރިޒޯޓެއްގައި ބަޓްބޯއި އަކަށް އުޅެނިކޮށް އެތަނުން ކަނޑާލީމާ ދެފަހަރަކު އެމްޑީޕީ ޕޯޑިއަމްއަށް އެރުމުން އެދިނީ 10 ހާސަމީހުން ގެ އާބާދީއެއްގެ ސިއްހީ ކަންކަން ބެލެހެއްޓުމުގެ ވެރިޔާގެ މަގާމް. ޑޮކްޓަރުންނާ ވާހަކަދައްކަނީ ހިންދީއާ އިންގްލިސް އާ ދެބައި އެއްކޮށްގެން. ޙެޔޮނުވާނެ މެނޭޖަރު ބަދަލު ކޮށްދެއްވާ
ހަމަ ރަން 5 އަހަރު ނިމުންއިރު ތިހާ ފީކަޅާކޮށްތަ ތިޔޮއް މަޝްހޫރު އާބާދީ ބޮޑު ރަށުގެ ސިއްޚީ ހާލަތު ހުރީ. އަޖައިނު ވެއްޖެ. ރައީސް ޔާމީނު ވެރިކަމުގައި ގެނައި ތަރައްޤީ އާހެދި ރާއްޖޭގަ ހިންގާނެ އިތުރު މަޝްރޫޢެއް ނެތިގެން އިބުއުޅޭކަމަށް މަށަށް އެގިފައި އޮތީ!