މާބަނޑު އިރު ގިނައިން ހިނގުމަކީ ވަރަށް މުހިންމު ކަމެއް!
ވީހާވެސް ހަރަކާތްތެރިވެ އުޅުމަކީ މާބަނޑު މީހާއަށް ފައިދާވާނެ ކަމެއް ކަމުގައި މީހުން ބުނާތީ އިވޭނެއެވެ. ނަމަވެސް މިއީ އެއްވެސް ހަގީގަތެއް އެކުލެވިގެންވާ ވާހަކައެއްތޯ ބަލާލަނީ މަދު ބަޔެކެވެ.
ގިނަ ހޯދުންތަކުން ދައްކާ ގޮތުގައި މާބަނޑުމީހާ ހިނގައި އުޅުމުން ރަހިމުގެ ދޮރަށް ކުރާ ޕްރެޝަރުގެ ސަބަބުން ޑައިލޭޓްވުމަށް މަގުފަހި ކޮށްދެއެވެ. ނަމަވެސް ގިނަ ތަޖުރިބާކާރުން ދެކޭގޮތުގައި މިއީ ކޮންމެހެން ވިހެއުމުގައި އެ ހޭދަވާ ވަގުތު ކުޑަކޮށް ނޫނީ ފަސޭހާކޮށްދޭ ކަމެއްނޫނެވެ.
ހިނގުމަކީވެސް ކަސްރަތަކަށް ވާއިރު ބަރުދަން ވަކިމިނެއްގައި ހިފަހައްޓަން ބޭނުންނަމަ ގިނައިން ހިނގަންވީއެވެ. މިއީ ހަމަ އެކަނި މާބަނޑުމީހާގެ ބަރުދަނުގެ ވާހަކައެއް ނޫނެވެ. ބަނޑުގައިވާ ދަރިފުޅުގެ ބަރުދަންވެސް އެންމެ ރަނގަޅު މިނެއްގައި ހިފަހައްޓައިދޭ ކަމެކެވެ. މީގެ އިތުރުން ބްލަޑް ޕްރެޝަރު ދަށްކޮށްދިނުމާއި އަދި މާބަނޑުދުވަސްވަރު ޖެހޭ ހަކުރުބަލީގެ ވައްތަރެއް ކަމަށްވާ ޖެސްޓޭޝަނަލް ޑައިބީޓީސް އިން ދުރުކޮށްދިނުން ވެސް ހިމެނެއެވެ.
އިތުރު މައްސަލަތަކެއް ދިމާ ނުވެ ކުރިޔަށްދާނަމަ މާބަނޑުދުވަސްވަރު ގިނައިން ހިނގުމުން އެއިން ފައިދާ ކުރާނީ ހަމައެކަނި ތިމާގެ ހަށިގަނޑަކަށް ނޫނެވެ. މިއީ ސްޓްރެސް ފިލުވާލައި މޫޑުވެސް ރަނގަޅުކޮށްދޭ ކަމެކެވެ. ނަމަވެސް ފާހަގަކޮށްލަން ޖެހޭ އެއް ކަމަކީ ކޮންމެ މީހަކީ ވެސް ތަފާތު މީހަކަށް ވުމުން އެމީހެއްގެ ހަށިގަނޑާއި އަދި އެމީހަކަށް ބަލިވެއިންނަ އިރު ދިމާވާ ކަންތައް ނޫނީ ކުރެވޭނެ ކަންތައްވެސް ތަފާތުވާނެކަމެވެ.
އެހެންކަމުން ކޮންމެ ކަމެއް ކުރަން ފެށުމުގެ ކުރިންވެސް ޑޮކްޓަރެއްގެ ލަފާ ހޯދުމަކީ ކޮންމެހެންވެސް ކުރަންޖެހޭ ވަރަށް މުހިންމުކަމެކެވެ. އަދި ތިމާގެ އަމިއްލަ ހަށިގަނޑު ބޭނުންވާ ކަންތައް ދަނެ، އެކަމަށް ސަމާލުވުންވެސް ވަރަށް މުހިންމެވެ.
