ކޮވިޝީލްޑް ވެކްސިންގެ ދެވަނަ ޑޯޒް ހޮނިހިރު ދުވަހު ދޭން ފަށަނީ
ކޮވިޑް-19 އިން ދިފާޢުވުމަށް ޖަހައި ކޮވިޝީލްޑް ވެކްސިންގެ ދެވަނަ ޑޯޒް ހޮނިހިރު ދުވަހު ދޭން ފަށަން ނިންމައިފިއެވެ.
ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ) އިން ވިދާޅުވީ ކޮވިޝީލްޑް ވެކްސިންގެ ދެވަނަ ޑޯޒް ދިނުން ހޮނިހިރު ދުވަހު ފެށޭނެ ކަމަށެވެ.
އެގޮތުން ކޮވިޝީލްޑް ވެކްސިން ދެވަނަ ޑޯޒް ދެވޭނީ ފެބްރުއަރީ 4-1 އާ ދެމެދު ފުރަތަމަ ޑޯޒް ޖަހާފައިވާ ފަރާތްތަކަށް ކަމަށް އެޗްއީއޯސީ ވިދާޅުވިއެވެ.
"ދެވަނަ ޑޯޒް ދިނުން ކުރިއަށް ދާނީ ސޯޝަލް ސެންޓަރ، ނެޝެނަލް އާޓް ގެލެރީ، ހުޅުމާލެ ފްލޫ ކްލިނިކް އަދި ވިލިމާލެ ޒުވާނުންގެ މަރުކަޒުގައި. ވެކްސިން ޖަހަން އަންނައިރު ވެކްސިން ކާޑް އަދި އައި.ޑީ ކާޑް/ޕާސްޕޯޓް/ލައިސަންސް ކާޑް ގެންނަން ވާނެ." އެޗްއީއޯސީން ވިދާޅުވެފައި ވެއެވެ.
ރާއްޖޭގައި މިހާތަނަށް ޖަހަން ހުއްދަ ދީފައި ވަނީ ތިން ވައްތަރެއްގެ ވެކްސިނަކަށެވެ. އެއީ ކޮވިޝީލްޑް ވެކްސިނާއި، ސިނޮފާމް ވެކްސިންގެ އިތުރުން ފައިޒާ ވެކްސިނެވެ. އެގޮތުން ކޮވިޝީލްޑް ވެކްސިންގެ ފުރަތަމަ ޑޯޒް ދިނުން މިހާރު ވަނީ ނިމިފައެވެ.
ރާއްޖޭގައި މިހާތަނަށް 240،773 މީހުންނަށް ވަނީ ކޮވިޑުން ދިފާޢުވުމަށް ވެކްސިން ދީފައެވެ.
Ads by STO
