ވެކްސިންގެ ބާރު އެކަށޭނަގޮތެއްގައި ފެންނާނީ، 8 ހަފްތާ ފަހުން ދެވަނަ ޑޯޒް ޖެހުމުން: ޑރ. ނަޒްލާ

ކޮވިޑް-19އިން ދިފާޢުވުމަށް ޖަހާ ވެކްސިންގެ ބާރު އެންމެ އެކަށޭނަ ގޮތެއްގައި ފެންނާނީ، ވެކްސިންގެ ފުރަތަމަ ޑޯޒް ޖަހާތާ 8 ހަފްތާ ފަހުން ދެވަނަ ޑޯޒް ޖެހުމުން ކަމަށް ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ)ގެ ތަރުޖަމާނު ޑރ. ނަޒްލާ ރަފީޤް ވިދާޅުވެއްޖެއެވެ.

Ads by Sosun Fihaara

އެޗްއީއޯސީން ރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. ނަޒްލާ ވަނީ، ވެކްސިންގެ ދެވަނަ ޑޯޒް ޖެހުމުގެ ކަންކަން ހޮނިހިރު ދުވަހު ފަށާފައިވާއިރު، އެކަމަށް އެންމެ ބޭނުންވާ ވަރަށް ތަރުޙީބު ލިބެމުން ނުދާކަން ފާހަގަ ކުރައްވައިފައެވެ.

ޑރ. ނަޒްލާ ވިދާޅުވީ މި ވެކްސިންގެ ބާރު އެންމެ އެކަށޭނަ ގޮތެއްގައި ފެންނާނީ ވެކްސިން ޖަހާތާ 8 ހަފުތާގެ ތެރޭގައި ދެވަނަ ޑޯޒް ޖެހުމުން ކަމަށާއި މި ސަބަބަށް ޓަކައި ވެކްސިން ޖެހިތާ 8 ހަފުތާ ފުރިހަމަ ވާއިރަށް ވެކްސިންގެ ދެވަނަ ޑޯޒް ޖެހުމަށް އަވަސްވެގަތުމަށެވެ.

"އެހެންވީމަ އަށް ހަފްތާވީމަ އެ ވެކްސިންގެ ދެވަނަ ޑޯޒް ޖެހީމަ އެ މީހާއަށް ވެސް އަދި މުޅި މުޖުތަމައުއަށް ލިބޭ ރައްކާތެރިކަން ބޮޑީ ވެސް. އަށް ހަފްތާގެ ކުރިން އަޅުގަނޑުމެން ދެވަނަ ޑޯޒެއް ޖަހާނީ ވަރަށް ހާއްސަ ހާލަތެއް ދިމާވެގެން އެކަން ވެރިފައި ކުރުމަށް ފަހު އެކަނި" ޑރ. ނަޒްލާ ވިދާޅުވިއެވެ.

ނަމަވެސް ޒަރޫރީ ހާލަތެއްގެ ގޮތުގައި ބަލައި، ސިއްޙީ ބޭނުމަކަށް ނުވަތަ ތަޢުލީމު ހާސިލު ކުރުމަށް ޤައުމުން ބޭރަށް ދާން ޖެހޭނަމަ، ދެވަނަ ޑޯޒް އޭގެ ކުރިން ޖަހައި ދެއްވާނެ ކަމަށް ވެސް ޑރ. ނަޒްލާ ވިދާޅުވިއެވެ.

ވެކްސިންގެ ދެވަނަ ޑޯޒް ޖަހަން ދާއިރު، ކުރިން ވެކްސިން ޖެހި ކާޑާއި ކާކުކަން އަންގައިދޭ ލިޔުމެއް ގެންދިޔުމަށް ވެސް ޑރ. ނަޒްލާ ހަނދާން ކޮށްދެއްވިއެވެ.