ރައީސް ޞާލިޙް ވެސް ކޮވިޝީލްޑް ވެކްސިންގެ ދެވަނަ ޑޯޒް ޖައްސަވައިފި
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވެސް ކޮވިޑް-19އިން ރައްކާތެރިވުމަށް ޖަހާ ކޮވިޝީލްޑް ވެކްސިންގެ ދެވަނަ ޑޯޒް ޖައްސަވައިފިއެވެ.
ކޮވިޑް-19އިން ދިފާޢުވުމަށް ރައީސް ޞާލިޙް ވެކްސިންގެ ފުރަތަމަ ޑޯޒް ޖެއްސެވީ ފެބްރުއަރީ މަހުގެ 1ވަަނަ ދުވަހުގައެވެ.
ވެކްސިން ޖެއްސެވުމަށް ފަހު އެ މަނިކުފާނު މިއަދު ކުރެއްވި ޓްވީޓެއްގައި ވިދާޅުވީ ވެކްސިންގެ ފުރަތަމަ ޑޯޒް ޖެހުމަށް ފަހު 8 ހަފްތާ ވެފައިވާ ނަމަ ލަސްނުކޮށް ދެވަނަ ޑޯޒް ޖަހަން އަވަސްވެ ގަތުމަށެވެ.
އަދި، ވެކްސިންގެ ފުރަތަމަ ޑޯޒް ޖައްސަވައިފައި ނުވާ ފަރާތްތަކުން ވެސް އަވަހަށް ވެކްސިން ޖަހަން ދިޔުމަށް ރައީސް ޞާލިޙް އެދިވަޑައިގެންފައިވެއެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) ގެ ތަފާސް ހިސާބުތަކަށް ބަލާއިރު، މިހާތަނަށް ރާއްޖެއިން 246،896 މީހުން ވެކްސިން ޖަހައިފައި ވެއެވެ. އޭގެ ތެރެއިން 3،737 މީހުން މިހާރު ވަނީ ވެކްސިންގެ ދެ ޑޯޒް ހަމަކޮށްފައެވެ.
