ޒިކުރާ މިސްކިތް ހުރި ދިމާލުން މިނިކަށިތަކެއް ފެނިއްޖެ
ޒިކުރާ މިސްކިތް ހުރި ބިމުގައި ވަގުތީ މިސްކިތެއް އެޅުމުގެ މަސައްކަތް ކުރަމުން ދަނިކޮށް އެ ދިމާލުން މިނިކަށިތަކެއް ފެނިއްޖެއެވެ.
އެ ދިމާލުން މިނިކަށިތަކެއް ފެނިފައިވާކަން އިސްލާމިކް މިނިސްޓްރީން ވެސް ވަނީ ޔަގީން ކޮށްދެއްވައިފައެވެ. އެ މިނިސްޓްރީން މިއަދު ވިދާޅުވީ މިނިކަށިތަކެއް ފެނުނު ކަމުގައި ވިޔަސް، ކަނޑައަޅައިފައިވާ އުސޫލުތަކާ އެއްގޮތަށް ވަގުތީ މިސްކިތް އެޅުމުގެ މަސައްކަތް ކުރައްވަމުން ގެންދަވާ ކަމަށެވެ.
މި ކަމާ ގުޅޭ ގޮތުން ދީނީ އިލްމުވެރިޔާ ޑރ. މުހައްމަދު އިޔާޟް ޢަބްދުއްލަތީފް ވިދާޅުވީ މިނިކަށި ފެންނަ ތަންތަނުގައި އިމާރާތްކޮށްގެން ނުވާނެ ކަމަށެވެ.
އަދި، އެ ތަނުގައި މިސްކިތް އިމާރާތް ކުރުމުގެ ކުރިން ގަބުރުތައް ނަގާފައި އިހުތިރާމާއެކު އެހެން ތަނެއްގައި ވަޅުލުމުން ރަނގަޅުވާނެ ކަމަށް ފިގްހް އެކަޑަމީން ނިންމާފައިވާ ކަމަށް ވެސް ޑރ. އިޔާޟް ވިދާޅުވިއެވެ.
އިމާރާތް ކުރުމަށް ކޮންނަމުން ދަނިކޮށް ރާއްޖޭގައި މީގެ ކުރިން ވެސް ވަނީ މިނިކަށި ފެނިފައެވެ. އެ ފަދައިން މިނިކަށި ފެނުމުން، ސަހަރާއެއްގައި އެ ކަށިތައް ވަޅުލުމަށް އިސްލާމިކް މިނިސްޓްރީން ވަނީ އިރުޝާދު ދެއްވައިފައެވެ.
Ads by STO
