މީހަކު ބަލިވެ އިނުމުން ނުވަތަ ވިހެއުމުން ތިވަރަށް ހަމަ ގޮތް ކިޔައިދޭން ޖެހޭތަ؟
ގިނަ ދިވެހިންނަކީ ކޮންމެ ކަމަކަށް ވެސް "ޚިޔާލެއް" ދޭން ބޭނުންވާ، ޚިޔާލެއް ދޭން ޖެހޭ ކަމަށް ޤަބޫލުވެސް ކުރާ ބައެކެވެ.
ކުރުގޮތަކަށް ބުނަންޏާ ގިނަ ދިވެހިން ނުބެހޭ ކަމެއް ނޯވެއެވެ. ކޮންމެ ކަމަކާއި ވެސް ވާހަކަ ދައްކާ ޚިޔާލެއް ދިނުމަކީ މަޖުބޫރު ކަމެއް ފަދައެވެ.
ކަންކަމުގައި ޚިޔާލު ދިނުމަކީ މައްސަލައެއް ނޫނެވެ. ހެޔޮ އެދޭ މީހުންނަށް ގޮތް ބުނެދޭން ވެސް ވާނެއެވެ. އެކަމަކު ކޮންމެ ވާހަކައެއް ވެސް ބުނެދޭންވީ ރަނގަޅު ގޮތެއް އޮންނާނެއެވެ. އަނެކާ ހިތަށް އަރާފާނެ އެއްޗަކާއިމެދު ވެސް ވިސްނާލަން ވާނެއެވެ.
އެފަދައިން އެންމެ ގިނަ މީހުން "ޚިޔާލުދޯ" "ފާޑު ކިޔާ" ހަދާ އެއްކަމަކީ އަންހެނަކު ބަލިވެ އިނުމާއި ވިހެއުމެވެ. ޚާއްސަކޮށް އަލަށް ބަލިވެ އިނދެ ވިހައިފިނަމަ މީހުން ގޮތް ކިޔައިދިނުން އިންތިހާއަށް ދެއެވެ.
އެގޮތުން މީހުން ބުނާ ބައެއް ބަސްތަކަށް ބަލާލަމާތޯއެވެ؟
▪︎"މީހާދޯ ފުފެނީ، ބަނޑެއް ނުފުފޭދޯ؟"
އެކި މީހުންގެ ބަނޑު ބޮޑުވާނީ އެކި ވަރަކަން މިހެން މިބުނާ މީހުންނަށް ނޭނގެނީބާއޭ ހިތަށް އަރައެވެ. ބަނޑު ކުޑަޔަސް ދަރިފުޅުގެ ސިއްޙަތު ރަނގަޅިއްޔާ އެއީ މައްސަލައެއް ނޫނެވެ.
▪︎"ޖަޕާނު މަހެއްދޯ"
ެއެއް ދަރިއަކަށްވުރެ ގިނައިން، ޚާއްސަކޮށް ކައިރި ކައިރީގައި ބަލިވެ އިންނަންޏާ މިފަދަ ބަސްތައް މީހުން ބުނެއެވެ. މާތް ﷲ ދެއްވަން ހުރި ނިއުމަތެއް ދެއްވާނެއެވެ. އެއީ އިންސާނުން ފާޑު ކިޔަންވީ ކަމެއް ނޫނެވެ.
▪︎"ދަރި ރަނގަޅަށް ބޮޑު ވޭތަ؟ ކުއްޖާ ކުޑަވެސް ވެދާނެ"
މިހެން ބުނާ މީހުންގެ އިންނަނީ ދެ ލޯ ބާއޭ ނުވަތަ ސްކޭނަރެއް ބާއޭ ހިތަށް އަރައެވެ. މިއީ ވެސް މާބަނޑު އަންހެން މީހާގެ ބަނޑު ކުޑަވުމުން އާއްމުގޮތެއްގައި އިވޭ ބަސްތަކެކެެވެ.
▪︎"ދޮންކެޔޮ ކެއިމަ ދަރި ދޮންވާނެ"
މިއީ އަނެއްކާ އަނެއް ވާހަކަ އެވެ. އެހެން މީހެއްގެ ދަރި ދޮން ކުރަން ތިބޭ މީހުން އަރުވާ ޖަހާލާފައި ތިބެނީ ކޮން ސަބަބަކާއި ހެދިކަމެއް ނުވިސްނެއެވެ. އަދި ހަމުގެ ކުލަ ކަޅުވުމުގެ މައްސަލައަކީ ކޮބާކަމެއް ވެސް ނޭނގެއެވެ.
▪︎"ހާދަ ކަޅު ވެފައޭ ތިހުރީ، ދެން ނުވެސް ހިކޭނެ"
ރޭސިޒަމް އާއި ދެކޮޅަށް އެންމެ ގިނައިން އަޑު އުފުލާ ބަޔަކަށް ދިވެހިން ވާނެއެވެ. ނަމަވެސް ހަމުގެ ކުލަ ކަޅުވެދާނެތީ އުޅޭ މީހުން ވެސް ދިވެހިންގެ ތެރޭގައި މަދެއް ނޫނެވެ. ކަޅު މީހުން ބާކީ ކޮށްލާ މީހުން ވެސް މަދެއް ނޫނެވެ. މީހުންގެ ސިފައާއި ބެހި، އެމީހުންނަށް ދެން ވާނެ ގޮތެއް ދަންނަ ރޯނު އެދުރުން ވެސް އިންތިހާއަށް ގިނައެވެ.
މިނޫން ވެސް މިފަދަ ބައިވަރު ކޮމެންތައް ނުވަތަ ބަސްތައް މީހުންނާއި ދިމާލަށް އެހެން މީސް މީހުން އެއްވެސް ވަރަކަށް ވިސްނާ ނުލާ ބުނެ އުޅެއެވެ. މާބަނޑު މީހުން، އެމީހުންގެ ދަރިން ގެންގުޅެންވީ ގޮތްވެސް އެހެން މީހުން ކިޔައިދެއެވެ. މިއީ ދެރަ ކަންކަމެވެ.
