މި އަހަރުގެ ނޫސްވެރިކަމުގެ އިނާމު ދިނުމުގެ ހަފްލާ މެއި މަހުގެ 23 ވަނަ ދުވަހު
މޯލްޑިވްސް މީޑިއާ ކައުންސިލުން މި އަހަރު ދިނުމަށް ހަމަޖެހިފައިވާ 'ނޫސްވެރިކަމުގެ އިނާމު 2020" ދިނުމުގެ ޙަފްލާ 23 މެއި 2021 ގައި ބޭއްވުމަށް ނިންމައިފިއެވެ.
މިއަހަރުގެ ނޫސްވެރިކަމުގެ އިނާމް، ޖުމުލަ 12 ދާއިރާއަކުން ދިނުމަށް ވަނީ ހަމަޖެހިފައެވެ.
މޯލްޑިވްސް މީޑިއާ ކައުންސިލުން ވިދާޅުވީ ނޫސްވެރިކަމުގެ އިނާމު 2020 އަށް ނަން ހުށަހެޅުމުގެ ފުރުސަތު މި އަހަރު ހުޅުވާލީ 02 މާރިޗު 2021 ގައެވެ. އަދި ނޫސްވެރިންނަށް ވީހައި ވެސް ގިނަ ވަގުތު ދިނުމުގެ ގޮތުން ދެ ފަހަރެއްގެ މަތިން މުއްދަތު އިތުރުކޮށް ސުންގަޑި ހަމަވީއިރު ޖުމުލަ 87 ހުށަހެޅުން ވަނީ ލިބިފައެވެ. އެއީ ތަހުގީގީ ނޫސްވެރިކަމުގެ ދާއިރާއިން 9، އިޖުތިމާއީ ދާއިރާއަށް 21، ސިޔާސީ ދާއިރާއިން 9، ޝަރުއީ އަދި ގާނޫނީ ދާއިރާއިން 6، ވިޔަފާރީގެ ދާއިރާއިން 9، ކުޅިވަރުގެ ދާއިރާއިން 5 ހުށަހެޅުމުގެ އިތުރަށް ފޮޓޯ ޖަރނަލިޒަމްގެ ދާއިރާއިން 6 އަދި ވީޑިއޯ ޖަރނަލިޒަމްގެ ދާއިރާއިން 3 ހުށަހެޅުން ކަމަށް އެ ކައުންސިލުން ހާމަ ކުރައްވާފައި ވެއެވެ.
ހަމަ އެހެންމެ އޯޑިއޯ ޖަރނަލިޒަމް އަދި ނިއުސް ގްރެފިކްސް އެންޑް އިލެސްޓްރޭޝަންސްގެ ދާއިރާއިން އެއްވެސް ހުށަހެޅުމެއް ލިބިފައި ނުވާ ކަމަށާއި ފީޗަރ ރިޕޯޓް ދާއިރާއަށް 17 ހުށަހެޅުން އަދި އުންމީދީ ނޫސްވެރިޔާގެ އިނާމަށް 2 ހުށަހެޅުން ހުށަހަޅާފައި ވާކަމަށް ވެސް މީޑިއާ ކައުންސިލުން ވިދާޅުވެފައި ވެއެވެ.
މިއީ މިހާތަނަށް ނޫސްވެރިކަމުގެ އިނާމަށް އެންމެ ބޮޑު ތަރުހީބެއް ލިބުނު އަދި އެންމެ ގިނަ ހުށަހެޅުން ލިބުނު އަހަރުކަން ފާހަގަކޮށް، ނޫސްވެރިކަމުގެ އިނާމަށް ކުރިމަތިލީ ހުރިހާ ނޫސްވެރިންނަށް މޯލްޑިވްސް މީޑިއާ ކައުންސިލުން ވަނީ ޝުކުރު އަދާކުރައްވާފައެވެ.
