ރަމަޟާންމަހު ސްކޫލްތަކުގައި ކިޔަވައިދޭނީ 3 ގަޑިއިރަށް

މި އަހަރުގެ ރަމަޟާންމަހު ސްކޫލްތަކުގައި ކިޔަވައިދޭނީ ތިން ގަޑިިއިރަށް ކަމަށް އެޑިއުކޭޝަން މިނިސްޓްރީން ހަމަޖައްސައިފިއެވެ.

Ads by Sosun Fihaara

ސްކޫލުތަކަށް މިދިޔަ މާރިޗް މަހުގެ 28 ވަނަ ދުވަހު ފޮނުވި ސާކިއުލާއެއްގައި އެ މިނިސްޓްރީން ބުނީ އެއް ދަންފަޅިއަށް ކިޔަވައިދޭ ސްކޫލުތައް ފަށާނީ ހެނދުނު 8:30-9:00 އާ ދެމެދު ކަމަށެވެ. އަދި ދެ ދަންފަޅީގެ ސްކޫލުތަކުގެ ގަޑިތައް ހެނދުނު 8:30 އާއި މެންދުރު ފަހު 3:00 އާ ދެމެދު ހަމަޖެއްސުމަށް އެޑިއުކޭޝަނުން ވަނީ އަންގާފައެވެ.

ރަމަޟާން މަހު އެލްކޭޖީ އަދި ޔޫކޭޖީގައި ކިޔަވާ ކުދިންނަށް ކިޔަވައި ދޭނީ 1 ގަޑިއިރާއި 30 މިނެޓު ވަންދެނެވެ. ގްރޭޑު 1-6 ގެ ކުދިންނަށް ދެ ގަޑިއިރާއި 30 މިނެޓު އަދި ގްރޭޑު 7 އިން މަތީގެ ކުދިންނަށް ތިން ގަޑިއިރަށް ކިޔަވައި ދިނުމަށް އެޑިއުކޭޝަނުން ވަނީ ހަމަޖައްސާފައެވެ.

މި އަހަރުގެ ރަމަޟާން މަހު މާއްދާއެއް ކިޔަވައިދޭ ވަގުތުގެ ދިގުމިން 30-45 މިނެޓާ ދެމެދަށް ފައްތަން ވެސް އެޑިއުކޭޝަނުން ނެރުނު ސާކިއުލާގައި އަންގައިފައިވެއެވެ. ހަމައެހެންމެ މަދުވެގެން ދެ ހަފުތާ ތެރޭގައި ހުރިހާ މާއްދާ ކިޔަވައިދެވޭނެ ގޮތަކަށް އިންތިޒާމު ކުރުމަށް އެޑިއުކޭޝަންގެ ސާކިއުލާގައި ވެއެވެ.