މަޖިލިސް އިންތިހާބަށްވުރެ ބޮޑު ކާމިޔާބީއެއް އެމްޑީޕީއަށް ލިބޭނެކަމުގެ އުންމީދާއެކު ރައީސް ޞާލިޙު ވޯޓު ލައްވައިފި
ރައްޔިތުންގެ މަޖިލިސް އިންތިހާބުގައި އެމްޑީޕީއަށް ލިބުނު ކާމިޔާބީއަށްވުރެ ބޮޑު ކާމިޔާބީއެއް މިއަދު ކުރިއަށްދާ ލޯކަލް ކައުންސިލުތަކުގެ އިންތިހާބުން އެ ޕާޓީއަށް ލިބިވަޑައިގަންނަވާ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ޖަމާލުއްދީން ސްކޫލްގައި، ހިންނަވަރު ދާއިރާއަށް ހާއްސަކޮށްފައިވާ ފޮއްޓަށް ވޯޓު ލެއްވުމަށްފަހު ނޫސްވެރިންނާ ބައްދަލު ކުރައްވައި ރައީސް ޞާލިޙް ވިދާޅުވީ ރާއްޖޭގެ އަތޮޅުތަކާއި މުޅި ރާއްޖޭގެ ހިންގުމަށް މި ވޯޓުގެ ނަތީޖާއާ އެކު ބޮޑު ބަދަލެއް އަންނާނެ ކަމަށާއި އެހެން ނަމަވެސް މިއީ ދަތި އުނދަގޫ ވަގުތެއްގައި ބާއްވާ އިންތިހާބެއް ކަމަށެވެ.
ވީހާ ވެސް ގިނަ މީހުން ނުކުމެ ވޯޓު ދިނުމަށް ރައީސް ޞާލިޙް އެދިވަޑައިގެންނެވިއެވެ.
"އުންމީދު ކުރަނީ އެމްޑީޕީއަށް މާލެ އެހެން ސިޓީތަކާއި އަތޮޅުތަކުން ވެސް ލިބޭނެ ކަމަށް. މަޖިލިސް އިންތިހާބުން ލިބުނު ކާމިޔާބީއަށް ވުރެ ބޮޑު ކާމިޔާބީއެއް ލިބޭނެ ކަމަށް އުންމީދުކުރަން." ރައީސް ޞާލިޙް ވިދާޅުވިއެވެ.
ރައީސް ވިދާޅުވީ ހުރި ދަތިތަކާ ހެދި ވޯޓު ލާން މީހުން ނުކުތުން މަދު ނަމަވެސް، މެންދުރު ފަހު މީހުން ނުކުންނާނެ ކަމަށް އުންމީދު ކުރައްވާ ކަމަށެވެ.
