ފޮށިތަކުގެ މައްސަލައިގައި ޤާނޫނީ ގޮތުން ފިޔަވަޅު އަޅަން ޖެހިއްޖެނަމަ އެކަމަށް ވެސް ތައްޔާރު: އިދިކޮޅު

މި މަހުގެ 10ވަނަ ދުވަހު ބޭއްވި ލޯކަލް ކައުންސިލް އިންތިހާބުގެ ނަތީޖާ ބަދަލު ކުރުމަށް ސަރުކާރުން ނުފޫޒު ފޯރުވާނަމަ، އެ މައްސަލަ ކުށްވެރިކޮށް އިލެކްޝަންސް ކޮމިޝަނަށް ހުށަހަޅައި، ޤާނޫނީ ގޮތުން ފިޔަވަޅު އަޅަން ޖެހޭނަމަ އެކަމަށް ވެސް ތައްޔާރުކަމަށް އިދިކޮޅުން ބުނެފިއެވެ.

Ads by STELCO

ޕްރޮގްރެސިވް ކޯލިޝަންގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމެއްގައި އެ ކޯލިޝަންގެ ތަރުޖަމާނު ހީނާ ވަލީދު ވިދާޅުވީ، މި ސަރުކާރުން ރައްޔިތުންނަށް ވީ ވައުދުތައް ނުފުއްދުމުގެ ސަބަބުން ރައްޔިތުން ވަނީ މި ސަރުކާރަށް ނޫނެކޭ ބުނެފައި ކަމަށެވެ.

އެހެންކަމުން ރައްޔިތުންގެ ނިންމުމަށް އިޙްތިރާމް ކުރުމަށާއި ވޯޓުން ވައްކަން ކުރުމާ ވޯޓަށް ނުފޫޒު ފޯރުވުމާއި އިންތިހާބުގެ ނަތީޖާ ބަދަލު ކުރުމަށްޓަކައި ސަރުކާރުން އީސީއަށް ނުފޫޒު ފޯރުވުމަށް ކުރަމުންދާ މަސައްކަތްތައް މިހާރުން މިހާރަށް ހުއްޓާލުމަށް ވެސް އިދިކޮޅުން ވަނީ ގޮވައިލައިފައެވެ.

"މި ކަންކަމާ ގުޅޭ ގޮތުން ޤާނޫނީ ގޮތުން އެޅެން ހުރި ފިޔަވަޅުތައް، އެއީ މިފަދަ މައްސަލަތަކާ ގުޅޭ ގޮތުން އަޅުގަނޑުމެންނަށް ކޯޓަށް މައްސަލަ ހުށަހަޅަން ޖެހިއްޖެ ހާލަތެއްގައި އެކަމަށް ވެސް އަަޅުގަނޑުމެން މިދަނީ ތައްޔާރުވަމުން" ހީނާ ވިދާޅުވިއެވެ.

ހީނާ ވިދާޅުވީ އިންތިހާބުން ލިބިފައިވާ އެއް ވޯޓު، ދެ ވޯޓު ނުވަތަ ފަސް ވޯޓުން އިދިކޮޅުގެ ކެންޑިޑޭޓުންނަށް ކާމިޔާބުވެފައިހުރި ފޮށިތަކުގެ ނަތީޖާ ބަދަލު ކުރުމަށް ސަރުކާރުން ނުފޫޒު ފޯރުވަން އުޅޭކަމުގެ ޝަކުވާ، ރާއްޖޭގެ އެކި ސަރަޙައްދުތަކުން އެ ކޯލިޝަނަށް ލިބެމުންދާ ކަމަށެވެ.

އެހެންކަމުން މި މައްސަލަތައް ބަލަމުންދާ ކަމަށް ހީނާ ވިދާޅުވިއެވެ.