އެއީ އަހަރެންގެ ބައްޕައެވެ. އަހަރެންގެ "ހީރޯ"އެވެ.
އާއިލާއެއްގެ އެންމެ މުހިންމެ އެއް ތަނބަކީ ބައްޕައެވެ. އެއީ ބުއްދި ރަނގަޅު ކޮންމެ މިހަކު ވިސްނާލި ކަމުގައި ވީނަމަވެސް ދޮގު ކުރެވޭނެ ވާހަކައެއް ނޫނެވެ. އެ ބައްޕަ އަހަރެމެން އުފަލުގައި ބެހެއްޓުމަށް ކުރަމުން އަންނަ ބުރަ މަސައްކަތް އަހަރެމެންނަށް ނުފެނުނު ކަމުގައި ވިޔަސް އެފަކީރު އަހަރެމެން އުފަލުގައި ބެހެއްޓުމަށް އެތައް މަސައްކަތްތަކެއް ކުރެއެވެ. އެއީ ހަގީިގީ ހީރޯއެވެ.
ކޮންމެ ދުވަހަކު ލޮލަށް ނުފެނުނަސް އެ ބައްޕަ އަހަރެމެން ދެކެ ވާ ލޯތްބަށް ކުޑަ ވެސް އުނިކަމެއް ނާދެއެވެ. އިރުއަރާ އިރުއޮއްސޭއިރު ވެސް ބައްޕަ ލޮލަށް ނުފެންނަ ދުވަސްތައް ގިނައެވެ. އޭގެ މާނައަކީ ތިބާގެ ބައްޕަ ތިބާއާއެކު ވަގުތު ހޭދަކުރަން ބޭނުން ނުވަނީއެއް ނޫނެވެ. އަދި ތިބާ ދެކެ އެ ބައްޕަ ލޯބި ނުވަނީއެއް ވެސް ނޫނެވެ. އެއީ ތިބާ ދެކެ ވާ ލޯތްބެއްގެ ބޮޑުކަމުން ތިބާ އުފަލުގައި ބެހެއްޓުމަށް ވާ ގުރުބާނީގެ ސަބަބުންނެވެ.
މަންމަ ކުރެން ކޮންމެ ދުވަހަކު ޝަކުވާ ކުރެވެއެވެ. ބައްޕަ ނުފެންނަނީ ކީއްވެގެން ހެއްޔެވެ؟ ބައްޕަ އެކުގައި ވަގުތު ހޭދަ ނުކުރަނީ ކީއްވެހެއްޔެވެ؟ އެހެންނަމަވެސް ތިބާ، ބޮޑުވަމުން އައިސް ވިސްނޭ ވަރު ވާން ފެށުމުން ބައްޕައެއްގެ ލޯތްބަކީ ކޮބައިކަން އެނގޭނެއެވެ. އަދި އެކަމާ ތިބާގެ ލޮލުން ކަރުނަ ފައިބާނެކަން ވެސް ކަށަވަރެވެ. ދެރަވެގެންނެއް ނޫނެވެ. ތިބާގެ ބައްޕަގެ ބުރަ މަސައްކަތާ މެދު ފަޚުރުވެރިވާ ޙާލުގައެވެ.
މިއަދު ތިބާ ނިދާ އެނދާއި، ތިބާ އެ ފުރާޅެއްގެ ދަށުގައި ދިރިއުޅެމުންދާ ގެއާއި، އެ ގޭގައި ތިބާ ހިތްހަމަ ޖެއްސުމަށް އޭސީ އަދި ޓީވީ ފަދަ ސާމާނު ހުރުމުގެ ހަގީގީ އަސްލަކީ ތިބާގެ ބައްޕައެވެ. އެ ބައްޕައަށް ތިބާގެ ލޯތްބާއި އަޅާލުން ދޭށެވެ. އެ ބައްޕަ މުސްކުޅިވާ ދުވަހު އެ ބައްޕައާމެދު އިހާަނެތިކޮށް ކަންތައް ނުކުރާށެވެ. މިއަދު ތިބާ ތިޔަ ހުރި މަގާމުގައި ތިބާގެ ބައްޕަ ނެތީސް ނުހުރެވޭނެކަން ޔަގީނެވެ.
