ކޮންމެ މީހަކަށް ވެސް ވަޓްސްއެޕް ނަންބަރު ސަސްޕެންޑު ކޮށްލެވިދާނެ، ރައްކާތެރިކަމުގެ ފިޔަވަޅު އަޅުއްވާ!
ގިނަ ބަޔަކު ބޭނުން ކުރަމުން އަންނަ މުވާސަލާތީ މަންސައެއް ކަމަށްވާ ވަޓްސްއެޕުގެ އިތުރު ސެކިއުރިޓީ މައްސަލައެއް ފެންމަތިވެއްޖެއެވެ.
ރިޕޯޓުތައް ބުނާ ގޮތުގައި މީހެއްގެ އަތުގައި އެމީހެއްގެ ވަޓްސްއެޕް ފޯނު ނަންބަރު އެކަނި އޮތް ނަމަވެސް، އަނެކާގެ ވަޓްސްއެޕް އެކައުންޓު ސަސްޕެންޑު ކޮށްލެވިދާނެއެވެ. މިއީ އެޕް އުފެއްދުމުގެ ލޫޕްހޯލެއް ކަމަށް ދިރާސާވެރިން ވަނީ ބުނެފައެވެ.
މި މައްސަލަ އެންމެ ފުރަތަމަ ރިޕޯޓު ކޮށްފައި ވަނީ ފޯބްސްއިންނެވެ. ފޯބްސްގެ ރިޕޯޓުގައި ވަނީ ސެކިއުރިޓީ މައްސަލަތައް ދިރާސާކުރާ ދުނިޔޭގެ ނަން މަޝްހޫރު ދެ ފަރާތަކަށް ހަވާލާ ދީފައެވެ.
މިގޮތަށް އެކައުންޓު ސަސްޕެންޑު ކޮށްލަނީ ވަޓްސްއެޕް އެކައުންޓު ހަދާފައިވާ އީމެއިލް ބޭނުން ކޮށްގެންނެވެ.
މިކަމުން ރައްކާތެރިވާން މާ ގިނަ ކަންތައްތަކެއް މިހާތަނަށް ހޯދިފައި ނެތް ނަމަވެސް އީމެއިލް ދިނުމުގައި 2 ފެކްޓާ އޮތޮރައިޒޭޝަނެއް ބޭނުން ކުރެވިދާނެއެވެ.
ވަޓްސްއެޕްގެ ޕްރައިވެސީ ޕޮލިސީއަށް ބަދަލު ގެނެސް، އެ އެޕްލިކޭޝަން ބޭނުން ކުރާ މީހުންގެ އިތުރު މައުލޫމާތު ފޭސްބުކާ ހިއްސާ ކުރެވޭ ގޮތް ހަދަން ނިންމުމުން މީގެ ކުރިން ވެސް ގިނަ ބަޔަކު ވަނީ ވަޓްސްއެޕް އާ ގުޅިގެން ކަންބޮޑުވުން ފާޅުކޮށްފައެވެ.
ފޭސްބުކުން 2014 ވަނަ އަހަރު ވަޓްސްއެޕް ގަތީ 19 ބިލިއަން ޑޮލަރަށެވެ. އަދި އޭރު އެ ކުންފުނިން ވަޓްސްއެޕްގެ ޕްރައިވެސީ ގަވާއިދުތަކަށް ބަދަލު ނުގެންނާނެ ކަމަށް ބުނެ، ވަޓްސްއެޕުން ފޭސްބުކާ މައުލޫމާތު ހިއްސާ ނުކުރެވޭނެ ގޮތް ހިޔާރު ކުރެވޭނެ ގޮތް ހެދި އެވެ. ނަމަވެސް އާ ސިޔާސަތުގެ ދަށުން ޔޫރަޕިއަން ޔޫނިއަންއިން ބޭރުގައި އެފަދަ އިހުތިޔާރެއް ނުދޭނެއެވެ.
