މިނިސްޓަރ މަޙްލޫފްގެ ނަމުގައި ފޭރެން އުޅޭ މައްސަލަ ފުލުހަށް ހުށަހަޅަން ނިންމައިފި
މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަމެންޓް އަހުމަދު މަޙްލޫފްގެ ނަންފުޅު ބޭނުން ކޮށްގެން، މީހުން އަތުން ފައިސާ ފޭރެން މަސައްކަތް ކުރާ މައްސަލަ ފުލުހަށް ހުށަހަޅުއްވަން އެމަނިކުފާނު ނިންމަވައިފިއެވެ.
މީސް މީޑިއާ ގައި ބަޔަކު ވަނީ މިނިސްޓަރ މަޙްލޫފްގެ ނަމާއި ފޮޓޯ ބޭނުން ކޮށްގެން ޕޭޖެއް ހުޅުވައިފައެވެ. އެ ޕޭޖަކީ "ގިވްއަވޭ" އިނާމުތަކެއްދޭ ޕޭޖެއް ކަމަށާއި "ރެޖިސްޓަރ" ކުރުމުން ފޯމެއް ފުރުމަށާއި އެކައުންޓުގެ ތަފްސީލުތައް ޖަހަން ވެސް ބުނެފައިވެއެވެ.
އެ ޕޭޖުގެ އިތުރުން، މަޙްލޫފްގެ ނަމާއި ފޮޓޯ ބޭނުން ކޮށްގެން މިއަދު އެހެން ޕޭޖެއް ވެސް ބަޔަކު ވަނީ ހަދައިފައެވެ. އެ ޕޭޖު ފެނުނު މީހަކު "ދެން" އަށް މައުލޫމާތު ދެމުން ބުނީ އިއްޔެ އިރުއޮއްސި 6:30 ހާއިރު މިނިސްޓަރ މަޙްލޫފް އިންނެވީ ލައިވްގައި ކަމަށާއި މިނިސްޓަރާއި އެމަނިކުފާނުގެ ދަރިފުޅު އެލީއާ އެކު ލަވައެއް ކިޔުމުގައި ބައިވެރި ވެގެން 10،000 ރުފިޔާ ހޯދުމުގެ ނަސީބުވެރި ފަރާތަކަށް ވުމަށް ބުނެފައިވާ ކަމަށް ވެސް އެ މީހާ ބުންޏެވެ. އަދި ހަމަ އެ ޕޭޖުން ރޭ ވެސް އެ ޕޯސްޓު ކޮށްފައިވާ ކަމަށް އޭނާ ބުންޏެވެ.
މި ޕޭޖުތަކާ ގުޅޭ ގޮތުން "ދެން"ގެ ފަރާތުން މިނިސްޓަރ މަޙްލޫފްއާ ސުވާލު ކޮށްލުމުން އެމަނިކުފާނު ވިދާޅުވީ، ވަރަށް ގިނަ ބަޔަކު މިކަމާ ގުޅޭގޮތުން އެމަނިކުފާނާ ސުވާލު ކުރައްވައިފި ކަމަށާއި އެއީ އެމަނިކުފާނު ހިންގަވާ އައިޑީތަކެއް އަދި ޕޭޖުތަކެއް ވެސް ނޫން ކަމަށެވެ.
"އަޅުގަނޑުގެ ހުރިހާ އައިޑީތަކެއް ވެސް ހުންނާނީ ވެރިފައި ކޮށްފައި. ކުރިން ވެސް މިފަދަ ޕޭޖުތަކެއް ހަދައިގެން ، އަޅުގަނޑު ވާނެ ބުނެފައި އާންމުން ސަމާލުވުމަށް. ވަރަށް ގިނަ ޕޭޖުތައް، އަޅުގަނޑުގެ ނަމާއި ފޮޓޯ ބޭނުން ކޮށްގެން ހަދައިފައި އެބަހުރި. އެ ޕޭޖުތަކުގެ ނަމަށް ބަލައިލުމުން ވެސް އެނގޭނެ އަޅުގަނޑުގެ ނަން ވެސް އިންނަނީ ނުބައިކޮށް ޖަހާފައި، އަދި އެކި އެއްޗެހީގައި އެކި ގޮތަށް އިންނަނީ ވެސް" މަޙްލޫފް ވިދާޅުވިއެވެ.
މިނިސްޓަރގެ ނަމާއި ފޮޓޯ ބޭނުން ކޮށްގެން މިފަދަ ޢަމަލުތަކެއް ބަޔަކު ކުރަމުން ގެންދާއިރު، މިކަމާ ގުޅޭގޮތުން ފިޔަވަޅެއް ނާޅުއްވަންތޯ ސުވާލު ކުރުމުން މިނިސްޓަރ ވިދާޅުވީ އެ މައްސަލަ ކުރިން ފޭސްބުކްއަށް ވެސް ހުށަހަޅާފައިވާނެ ކަމަށެވެ.
"ފޭސްބުކްއަށް ވެސް އަޅުގަނޑު ކުރިން އިންނާނެ މި މައްސަލަ ޖައްސާފަ. މިހާރު ފުލުހުންނަށް ވެސް ރަސްމީކޮށް މި މައްސަލަ ހުށަހަޅަން މި އުޅެނީ. ވަރަށް ސިސްޓެމެޓިކްކޮށް ބަޔަކު ކުރާ ކަމެއްގެ ގޮތުގައި އަޅުގަނޑަށް ވެސް އެބަ ފީލްވޭ" މިނިސްޓަރ ވިދާޅުވިއެވެ.
މިނިސްޓަރ މަޙްލޫފް އެދިލެއްވީ، މި ފަދައިން ހަދައިފައި ހުންނަ ޕޭޖުތަކަށް އިޖާބަ ނުދިނުމަށާއި، އޭގައި ހިއްސާ ކުރަން ބުނާ މައުލޫމާތުތައް ވެސް ހިއްސާ ނުކޮށް، ރައްޔިތުން ހޭލުންތެރިވެ ތިބުމަށެވެ.
ރީލޯޑް މަހޭ މީނަ އަމިއްލައަށް ނޫހުގެފަލަސުރުހީއަކައް އަރަންކުރާނެ ކަމެއްތީ