އިންޑިއާ އިން ރާއްޖެ އަންނަ ފަތުރުވެރިން ގެސްޓްހައުސްތަކާއި ހޮޓާތަކުގައި ތިބުން މަނާކޮށްފި

އިންޑިއާއިން ދިވެހިރާއްޖެއަށް އަންނަ ފަތުރުވެރިން ގެސްޓްހައުސްތަކާއި ހޮޓާތަކަށް ޗެކިންވުން މަނާކޮށްފިއެވެ.

Ads by Sosun Fihaara

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ގެޒެޓް ކޮށްފައިވާ އެންގުމުގައި ބުނެފައި ވަނީ 27 އޭޕްރީލް 2021 އިން ފެށިގެން، ވަކިގޮތެއް އަންގަންދެން އިންޑިއާއިން ދަތުރު ކުރުމުގައި، ޚާއްޞަ ފިޔަވަޅުތަކެއް އެޅުމަށް އަންގާ ކަމަށެވެ. އެ ފިޔަވަޅުތަކަކީ:

1. ކޮވިޑް-19 ގެ ވެކްސިންގެ ޑޯޒްތައް ފުރިހަމަކޮށްފައިވާ މީހުން ހިމެނޭގޮތަށް، އިންޑިއާއިން ދިވެހިރާއްޖެއަށް ދަތުރުކުރާ މީހުންނާއި އިންޑިއާގައި ދިރިއުޅެފައިވާ މީހުން (މީގެ ތެރޭގައި ޓްރާންސިޓްގައި 24 ގަޑިއިރަށް ވުރެ ގިނައިރު އިންޑިއާގައި ހޭދަ ކޮށްފައިވާ މީހުން ހިމެނޭގޮތަށް) ދިވެހިރާއްޖެއަށް އެތެރެވާއިރު 96 (ނުވަދިހަ ހައެއް) ގަޑިއިރު ނުވާ ނެގެޓިވް ޕީ.ސީ.އާރު ޓެސްޓުގެ ނަތީޖާއަކާއެކު ދަތުރުކުރުން.
2. ކޮވިޑް-19 ގެ ވެކްސިންގެ ޑޯޒްތައް ފުރިހަމަ ކޮށްފައިވާ މީހުން ހިމެނޭ ގޮތަށް އިންޑިއާއިން ރާއްޖެއަށް އަންނަ ދިވެހިންނާއި ވޯކް ޕާރމިޓް ހޯލްޑަރުން ރާއްޖެ އައުމަށް ފަހު 24 (ސައުވީސް) ގަޑިއިރުގެ ތެރޭގައި ޖީ.ސީ.އާރު ޓެސްޓް ހެދުމާއި، 10 (ދިހައެއް) ދުވަހުގެ މުއްދަތަށް ކަރަންޓީނު ވުން.
3. 1 ވަނަ ނަންބަރުގައި ބަޔާން ކޮށްފައިވާ ގޮތުގެ މަތީން އިންޑިއާއިން ރާއްޖެއަށް ދަތުރުކުރާ ފަތުރުވެރިން ރާއްޖެއިން ފުރުމުގެ ކުރިން ޑިޕާޗަރ ޕީ.ސީ.އާރު ޓެސްޓެއް ހެދުން.
4. އިންޑިއާއިން ދިވެހިރާއްޖެއަށް އަންނަ ފަތުރުވެރިން (މީގެ ތެރޭގައި ޓްރާންސިޓްގައި 24 ގަޑިއިރަށް ވުރެ ގިނައިރު އިންޑިއާގައި ހޭދަކޮށްފައިވާ ފަތުރުވެރިން ހިމެނޭގޮތަށް) ދިވެހިރާއްޖޭގެ ހުރިހާ ގެސްޓްހައުސްތަކާއި ސިޓީ ހޮޓާ (މީހުން ދިރިއުޅޭ ތަންތަނާ މުޅިން ވަކިން ހުންނަ ސިޓީ ހޮޓާތައް ފިޔަވައި) ތަކަށް ޗެކްއިން ވުން ހުއްޓައިލުން.

އެޗްޕީއޭއިން ބުނީ މިހާރު މިފަދަ ތަންތަނުގައި ޗެކްއިން ވެފައި ތިބި އިންޑިއާއިން ދަތުރުކޮށްފައިވާ ފަތުރުވެރީންނަށް ބުކިން ހަދައިފައިވާ މުއްދަތަށް ތިބުމުގައި އެއްވެސް ހުރަހެއް ނެތް ކަމަށެވެ.

އެޗްޕީއޭއިން ވަނީ މި އެންގުމާ ގުޅިގެން ދައުލަތުގެ ކަމާބެހޭ މުއައްސަސާތަކުން އަދާކުރާން ޖެހޭ ޒިންމާތައް އަދާކުރުމުގެ ގޮތުން އަޅާ ފިޔަވަޅުތަކާއި ދޭ އިރުޝާދުތަކާ އެއްގޮތަށް ޢަމަލު ކުރުމަށް ވެސް އެންމެހައި ފަރާތްތަކަށް އަންގައިފައެވެ.