"ބަދަލު ދޭން ޖެހެނީ ކޮންބައެއްގެ ސަބަބުންތޯ ބަލައި، ފައިސާ ހޯދަން ޖެހޭނީ އެމީހުން އަތުން"
ދައުލަތުން އެކި ފަރާތްތަކަށް ބަދަލު ދޭން ޖެހެނީ ކޮން ބައެއްގެ ސަބަބުންތޯ ބަލަން ޖެހޭ ކަމަށާއި ބަދަލުގެ ގޮތުގައި ދައްކަން ޖެހޭ ފައިސާ ހޯދަން ޖެހޭނީ އެމީހުންގެ އަތުންކަމަށް ރައްޔިތުންގެ މަޖިލީހުގެ ވިލުފުށީ ދާއިރާގެ މެމްބަރު ހަސަން އަފީފް މިއަދު ވިދާޅުވެއްޖެއެވެ.
އޯވަރޑްރޯގެ މުއްދަތު އިތުރުކުރަން ސަރުކާރުން އެދުނީ އެކި ފަރާތްތަކަށް ބަދަލުދިނުމަށްކަމަށް ވިދާޅުވެ މާވަށު ދާއިރާގެ މެމްބަރު މުހައްމަދު ސައީދު ދެއްކެވި ވާހަކައަށް ރައްދު ދެއްވަމުން އަފީފު ވިދާޅުވީ ކުރީ ސަރުކާރުން އެކި ފަރާތްތަކުގެ ވިޔަފާރިތައް ހުއްޓުވައި ގާނޫނާ ޚިލާފަށް މުދާ އަތުލަމުން ދިޔައިރު އޭރު ވަޒީރު ކަމުގައި ތިއްބެވި ބޭފުޅުން އެއްވެސް ކަމެއް ނުކުރައްވާ ކަމަށެވެ. އަދި އެބޭފުޅުން ވިދާޅުވަމުން ގެންދެވީ "ތިމަންނައާ ބެހޭ ކަމެއް ނޫނޭ، ދައުލަތުންނެއް ނޫންހޭ ބަދަލު ދޭނީ." ކަމަށް ވެސް އަފީފް ވިދާޅުވިއެވެ.
"އެހެރީ އެކިއެކި މަޝްރޫއުތައް ހަވާލުކޮށްފަ، އަނެއްކާ އަނެއް ދުވަހު ގޮސް މި ވިދާޅުވަނީ ތިމަންނަ އެ ގާނޫނާ ޚިލާފަށޭ ބާތިލުކުރީ. މިހެން ވިދާޅުވާ ބޭފުޅުން އަތުން ފައިސާ އަތުލުމަކީ މިއަދު ދައުލަތަށް މަޖުބޫރުވެފައިވާ ކަމެއް." އަފީފު ވިދާޅުވިއެވެ.
މެމްބަރު ސައީދުގެ ވާހަކައިގައި އިޝާރާތް ކުރެއްވީ އެމްއީއެސް ކުރިން ހިންގި އިމާރާތް މަންދު ކޮލެޖަށް ދޫކުރި އެއްބަސްވުން ބާތިލްކޮށް، އަތުލި މައްސަލާގައި ލިބުނު ގެއްލުމުގެ ބަދަލަށް 15 މިލިއަން ރުފިޔާ ދައްކަން ދައުލަތުގެ މައްޗަށް ސިވިލް ކޯޓުން ކުރި ހުކުމަށެވެ.
Ads by STO
