ޚަލީލްގެ ލޮރީއެއްގައި ރޯކޮށްލައި، 3 ލައްކައަށް ވުރެ ގިނަ ރުފިޔާގެ ގެއްލުން ދީފި
ރައްޔިތުންގެ މަޖިލީހުގެ ފ.ނިލަންދޫ ދާއިރާގެ ކުރީގެ މެމްބަރު ޑރ. ޢަބްދުﷲ ޚަލީލްގެ ލޮރީއެއްގައި ރޯކޮށްލައި، 3 ލައްކައަށް ވުރެ ގިނަ ރުފިޔާގެ ގެއްލުން ދީފިއެވެ.
މި ހާދިސާއާ ގުޅޭގޮތުން "ދެން" އަށް މައުލޫމާތު ދެއްވަމުން ޑރ. ޚަލީލް ވިދާޅުވީ، އެ ލޮރީއަކީ ސެކަންޑް ހޭންޑް ލޮރީއެއް ކަމަށާއި، ބޭނުން ކުރާތާ ފުދޭ ވަރަކަށް ދުވަސް ވެސް ވެފައިވާ ލޮރީއެއް ކަމަށެވެ.
"ސެކަންޑް ހޭންޑް ލޮރީއެއް އެއީ. ފުދޭ ވަރަކަށް ދުވަސް ވެސް ވެއްޖެ. އެހެންވީމަ މިހާރުގެ އަގުތަކަށް ބަލާއިރު ގާތްގަނޑަކަށް 3 ލައްކަ 50 ހާސް ރުފިޔާގެ ގެއްލުމެއް އަޅުގަނޑުމެންނަށް މި ލިބުނީ" ޑރ. ޚަލީލު ވިދާޅުވިއެވެ.
ޑރ. ޚަލީލް ވިދާޅުވީ އެ ލޮރީއަކީ އާއިލީ ވިޔަފާރީގައި ގެންގުޅޭ އުޅަނދެއް ކަމަށާއި ނިލަންދޫގެ ކުނި ގޮނޑު އޮންނަ ސަރަޙައްދުގައި ލޮރީ ބާއްވާފައި އޮއްވާ ރޯކޮށްލާފައި ވަނީ އިއްޔެގެ ދެ ނަމާދު ދޭތެރެ ވަގުތުގައި ކަމަށް މައުލޫމާތު ލިބިފައިވާ ކަމަށެވެ. ރަށުގައި ތިބި އާއިލާގެ މީހުންނަށް އެ މައުލޫމާތު ފުރަތަމަ ލިބިގެން އެތަނަށް ދިޔައިރު ފުލުހުން އެ ސައިޓަށް ގޮސް ތިބި ކަމަށް ވެސް ޑރ. ޚަލީލް ވިދާޅުވިއެވެ.
"ކޮމިއުނިޓީ ބޭސްޑް މަސައްކަތްތަކަށް (ކައުންސިލުން އެދޭ މަސައްކަތްތަކަށް) އަޅުގަނޑުމެން ގެންގުޅޭ އުޅަނދުތައް މި ދޫކުރަނީ، ތެޔޮ އަޅައިގެން ބޭނުން ކުރާ ގޮތަށް. އެހެންވީމަ މިގޮތަށް އެއްޗެހިތައް ހަލާކުވެގެން ދިޔުން، ނުވަތަ ރޯކޮށްލުން މިއީ ކޮމިއުނިޓީއަށް ވެސް ލިބޭނެ ވަރަށް ބޮޑު ގެއްލުމަކަށް ވާނެ. އެއީ އަޅުގަނޑުމެން ވަރަށް ކަންބޮޑުވާ ކަމެއް" ޑރ. ޚަލީލް ވިދާޅުވިއެވެ.
މި މައްސަލަ ފުލުހުން އިތުރަށް ތަހުގީގު ކުރައްވަމުން އަންނަ ކަމަށް ވެސް ޑރ. ޚަލީލު އިތުރަށް ވިދާޅުވިއެވެ.
Ads by STO
