ކޮވިޑުން ރައްކާތެރި ވުމަށް ފިޔަވަޅުތައް ހަރުކަށި ކުރުމަށް މަޝްވަރާ ކުރަނީ
ރާއްޖޭގައި ކޮވިޑް-19 ހަލުވިކަމާއެކު ފެތުރެމުން ދިއުމާ ގުޅިގެން ރައްކާތެރިވުމަށް ފިޔަވަޅުތައް ހަރުކަށި ކުރުމަށް މަޝްވަރާތަކެއް ފަށައިފިއެވެ.
ރާއްޖޭގެ ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިހު ކުރެއްވި ޓުވީޓެއްގައި ވިދާޅުވެފައި ވަނީ، ރާއްޖޭގައި ކޮވިޑަށް ފައްސިވާ މީހުންގެ އަދަދު އިތުރު ވުމަކީ އެމަނިކުފާނު ކަންބޮޑުވެލައްވާ ކަމެއް ކަމަށާއި، އަޅައިފައިވާ ފިޔަވަޅުތަކަށް އަދިވެސް ޚާއްސަ ސަމާލުކަމެއް ދިނުމަށް އިލްތިމާސް ކުރާ ކަމަށެވެ. މީގެ އިތުރުން ފިޔަވަޅުތައް އިތުރަށް ވަރުގަދަ ކުރުމަށް މިއަދު މަޝްވަރާ ކުރައްވާ ކަމަށް ވެސް ޓުވީޓުގައި ފާހަގަ ކުރައްވައިފައި ވެއެވެ.
ރައީސް މިފަދައިން ވިދާޅުވެ ޓުވީޓު ކުރައްވައިފައިވާ މި ދަނޑިވަޅުގައި ކޮވިޑްގެ ފައްސި އަދަދުތައް އުޅެނީ ވަރަށް މަތީގައެވެ. އެ ގޮތުން އަތޮޅުތަކުގައި ވެސް މި ނަމްބަރު އިތުރުވަމުންދެއެވެ.
އިއްޔެގެ އިރުއޮއްސުމާ ހަމައަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ނެރުނު ތަފާސް ހިސާބުތަކަށް ބަލާއިރު، އިއްޔެ އެކަނި ވެސް މާލެއިން 276 މީހަކު ވަނީ ކޮވިޑަށް ފައްސިވެފައެވެ. އަދި އަތޮޅު ތެރެއިން 185 މީހަކު ފައްސިވެފައިވާއިރު، ރިސޯޓުތަކުން 12 މީހަކު ވަނީ މި ބައްޔަށް ފައްސި ވެފައެވެ. އަދި އިންޑަސްޓްރިއަލް މަސައްކަތް ކުރާ ރަށްތަކުން 32 މީހަކު ކޮވިޑަށް ފައްސިވެފައި ވެއެވެ.
އެއާއެކު އަތޮޅު ތެރޭގައި މި ބަލި ޖެހިފައިވާ މީހުންގެ ޖުމުލަ އަދަދު ވަނީ 1902 އަށް އުފުލިފައެވެ. އޭގެ ތެރޭގައި ގިނައީ ދިވެހިންނެވެ. އެގޮތުން 1342 ދިވެހިންނާއި 560 ބިދޭސީން އަތޮޅުތެރެއިން ފައްސިވެފައި ވެއެވެ. އެންމެ ގިނައިން ބައްޔަށް ފައްސިވެފައިވާ މީހުން ތިބި ރަށްތަކުގެ ތެރޭގައި، ޅ. ނައިފަރާއި ކ. މާފުށި އަދި އއ. މަތިވެރި ހިމެނެއެވެ. އަދި ކ އަތޮޅު މާފުށީގައި އެކަނި ވެސް 300 އަށް ވުރެ ގިނަ މީހުން ފައްސިވެފައި އެބަތިއްބެވެ.
Ads by STO
