އައްޑޫ ސިޓީ ހިތަދޫން މީހަކު ކޮވިޑަށް ފައްސިވެއްޖެ
އައްޑޫ ސިޓީ ހިތަދޫން މީހަކު ކޮވިޑަށް ފައްސިވެއްޖެއެވެ.
“ދެން” އަށް މައުލޫމާތު ލިބިފައިވާ ގޮތުގައި، އެރަށުން ކޮވިޑަށް ފައްސިވެފައި ވަނީ ބަލީގެ އަލާމާތްތައް ހުރުމުގެ ސަބަބުން ރަށުގެ ފްލޫ ކްލިނިކަށް ދެއްކި މީހެކެވެ.
އެ ސިޓީން މިފަހަރު އެންމެ ފުރަތަމަ ކޮވިޑަށް ފައްސިވެފައި ވަނީ މިދިޔަ ހޮނިހިރު ދުވަހު ފްލޫ ކްލިނިކަށް ދެއްކި މީހެކެވެ. އެއާއެކު ސިޓީ މޮނިޓަރިންގެ ހާލަތަށް ލެވި، އެ ސިޓީގެ ގުޅިފައިވާ ރަށްތަކަށް އަރައި ފޭބުން ވަނީ މަނާ ކުރެވިފައެވެ.
ފަހަކަށް އައިސް ކޮވިޑަށް ފައްސިވާ މީހުންގެ އަދަދު ވަނީ އިތުރުވެފައެވެ. އެ ގޮތުން އިއްޔެއާ ހަމައަށް އެޗްޕީއޭއިން އާންމު ކުރި ތަފާސް ހިސާބުތަކަށް ބަލާއިރު، އަތޮޅުތެރޭގައި ޖުމްލަ 1902 މީހަކު ކޮވިޑަށް ފައްސިވެފައި ވެއެވެ. އަދި އޭގެ ތެރެއިން 1300 އަށް ވުރެ ގިނައީ ދިވެހިން ކަމަށް ވެސް އެ ތަފާސް ހިސާބުތަކުން ދައްކައެވެ.
