ސްކޫލުތައް ބަންދުކުރުމާ ގުޅޭގޮތުން ދަނީ މަޝްވަރާ ކުރެވެމުން: މިނިސްޓްރީ

ކޮވިޑް-19ގެ ހާލަތު ރާއްޖޭގައި ގޯސް ވުމުގެ ސަބަބުން ރާއްޖޭގެ ސުކޫލުތައް ބަންދު ކުރުމާ މެދު މަޝްވަރާ ކުރެވެމުން ދާ ކަމަށް އެޑިއުކޭޝަން މިނިސްޓަރު ޑރ. އައިޝަތު އަލީ މިއަދު ވިދާޅުވެއްޖެއެވެ.

Ads by Hajj Corporation

މިއަދު އެޑިއުކޭޝަން މިނިސްޓްރީން ބޭއްވި ނޫސްވެރިންގެ ބައްދަލުވުމެއްގައި ނޫސްވެރިއަކު ކުރި ސުވާލަށް ޖަވާބު ދެއްވަމުން މިނިސްޓަރު ވިދާޅުވީ، ސުކޫލުތައް ބަންދު ކުރުމާ ގުޅޭގޮތުން މަޝްވަރާ ކުރެވެމުން އަންނަ ކަމަށާއި، ހެލްތު ޕްރޮޓެކްޝަން އެޖެންސީ (އެޗްޕީއޭ) މެދުވެރިކޮށް ވަރަށް އަވަހަށް އެކަމާ ގުޅޭ މައުލޫމާތު ހާމަ ކުރާނެ ކަމަށެވެ.

ނިމިދިޔަ ހަފްތާ ތެރޭގައި ވެސް ރާއްޖެއިން 24 ގަޑިއިރު ތެރޭ ރެކޯޑު އަދަދަކަށް ކޮވިޑްގެ ފައްސި ކޭސްތައް ވަނީ ފެނިފައެވެ. ޚާއްޞަކޮށް އަތޮޅުތަކުން ފައްސިވާ އަދަދު ވަނީ ވަރަށް ބޮޑު ތަނުން އިތުރުވެފައެވެ. ރަށްރަށުން ފެންނަ ފައްސި ކޭސްތަކާ ގުޅިގެން މިހާރު ވެސް 25 ރަށަކާއި އައްޑޫ ސިޓީ އަދި ކުޅުދުއްފުށި ސިޓީ އޮތީ މޮނިޓަރިންގައެވެ.

ބަލި ފެތުރުން ހުއްޓުވުމަށް އަތޮޅުތެރޭގެ އެއްރަށުން އަނެއް ރަށަށް ދަތުރު ކުރުން މިހާރު ވަނީ މަނާ ކުރެވިފައެވެ.