ހެލްތު މިނިސްޓްރީގެ ހުސްވެފައިވާ އިސް ދެ މަގާމަކަށް ބޭފުޅުން އައްޔަން ކުރައްވައިފި
ހެލްތު މިނިސްޓްރީން ހުސްވެފައިވާ އިސް ދެ މަގާމަކަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް، ބޭފުޅުން އައްޔަން ކުރައްވައިފިއެވެ.
ރައީސް އޮފީހުން ވިދާޅުވީ، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 115 ވަނަ މާއްދާގެ (ޅ) އިން ރައީސުލްޖުމްހޫރިއްޔާގެ މަގާމުގެ ވާޖިބު އަދާކުރެއްވުމަށްޓަކައި ބޭނުންފުޅުވާ މަގާމުތަކަށް މީހުން ޢައްޔަންކުރެއްވުމަށް، ރައީސުލްޖުމްހޫރިއްޔާއަށް ލިބިވަޑައިގަންނަވާ ބާރުގެ ދަށުން، މިނިސްޓަރ އޮފް ސްޓޭޓް ފޮރ ހެލްތުގެ މަގާމަށް އަލްފާޟިލާ ޢާއިޝަތު ރަޝީދު، އަދި މިނިސްޓަރ އޮފް ހެލްތުގެ ނައިބުގެ މަގާމަށް އަލްފާޟިލް ޢަބްދުއްޝުކޫރު ޢަބްދުލްހަކީމް މިއަދު އައްޔަން ކުރައްވާފައިވާ ކަމަށެވެ.
އަލްފާޟިލާ ޢާއިޝަތު ރަޝީދު ވަނީ މީގެ ކުރިން މިނިސްޓަރ އޮފް ސްޓޭޓް ފޮރ ޖެންޑަރ، ފެމިލީ އެންޑް ސޯޝަލް ސަރވިސަސްގެ މަގާމް އަދާ ކުރައްވައިފައެވެ.
އަދި، އަލްފާޟިލް ޢަބްދުއްޝުކޫރު ޢަބްދުލްހަކީމް ވަނީ މީގެކުރިން މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްގެ ނައިބުގެ މަގާމު އަދާކުރައްވާފައެވެ.
ޖެންޑާގެ ދެ ވެރިން ހެލްތަށް ބަދަލުކޮށްފައި ވަނީ ޖެންޑާ މިނިސްޓްރީގައި ބޮޑެތި ހިޔާލު ތަފާތުވުންތަކެއް އުފެދި މިނިސްޓަރު އައިޝަތު މުހައްމަދު ދީދީ އާއި އެ މިނިސްޓްރީގައި ސިޔާސީ މަގާމުތަކުގައި ތިއްބެވި އެހެން ވެރިންނ ވަރަށް ބޮޑަށް ގުޅުން ގޯސްވެފައިވާ ވަގުތެއްގައި ކަމަށް މައުލޫމާތު ލިބެއެވެ.
Ads by STO
