ގައިޑްލައިންތަކާ ޚިލާފުވި 352 މީހެއް ޖޫރިމަނާ ކޮށްފި

ކޮވިޑް-19 ކޮންޓްރޯލު ކުރުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ކަނޑައަޅައިފައިވާ ގައިޑްލައިންތަކާ ޚިލާފުވި 352 މީހަކު ޖޫރިމަނާ ކޮށްފިއެވެ.

Ads by MWSC

ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ)އިން މިރޭ ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މަބްރޫކް ޢަބްދުލްްއަޒީޒް ވިދާޅުވީ ކާފިއުގެ ވަގުތުތަކާ ހިލާފުވުމުގެ ސަބަބުން މިއަދު އެކަނި 217 ފަރާތެއް ޖޫރިމަނާ ކޮށްފައިވާ ކަމަށެވެ.

މާލެ ސަރަޙައްދުގެ ކާފިއު ވަގުތަކީ ހަވީރު 4:00 އިން ފަތިހު 4:00 އަށެވެ.

ބުދަ ދުވަހުގެ 24 ގަޑިއިރުގެ ތެރޭގައި ކާފިއު ވަގުތާ ހިލާފުވުމުގެ އިތުރަށް މާސްކް ނާޅައި ބޭރުގައި އުޅުނު 135 މީހަކު ވެސް ޖޫރިމަނާ ކޮށްފައި ވެއެވެ. ކޮވިޑްގެ ހާލަތާ ގުޅިގެން ރާއްޖޭގައި މީހުން ދިރިއުޅޭ ހުރިހާ ރަށެއްގައި ވެސް، ބޭރަށް ނުކުމެ އުޅޭއިރު މާސްކު އަޅައިގެން ނުކުތުމަށް އެޗްޕީއޭއިން ވަނީ އަންގައިފައެވެ.

މީގެ އިތުރުން އެޗްޕީއޭއިން އަޅާފައިވާ ފިޔަވަޅުތަކާ އެއްގޮތަށް ފިހާރަތަކާއި، ކެފޭތަކާއި ޖިމްތައް އަމަލު ކުރަމުން ދޭތޯ ބެލުމަށް ކުރެވުނު ފުޅާ އިންސްޕެކްޝަންގެ ތެރެއިން 3 ތަނެއް އެޗްޕީއޭގެ ގަވާއިދުތަކާ ހިލާފަަށް ހިދުމަތް ފޯރުކޮށްދެމުން ދާކަމަށް ފާހަގަކުރެވި ފިޔަވަޅު އަޅައިފައިވާ ކަމަށް ވެސް މިރޭގެ ޕްރެސް ކޮންފަރެންސްގައި މަބްރޫކް ވަނީ ވިދާޅުވެފައެވެ.