ކޮވިޑް-19: މިއަދުގެ 7 ވަނަ މަރު
ކޮވިޑް-19 ޖެހިގެން ރާއްޖެއިން އިތުރު މީހަކު ނިޔާވެއްޖެއެވެ.
މައުލޫމާތު ލިބިފައިވާ ގޮތުގައި ނިޔާވެފައި ވަނީ 62 އަހަރުގެ އަންހެނެކެވެ. އޭނާ އަކީ ހާލު ދެރަވެ، މިއަދު މެންދުރުގެ ވަގުތެއްގައި އެމަޖެންސީއަށް ގެންދެވުނު މީހެކެވެ.
މިއީ ކޮވިޑް ބަލީގައި މިއަދު ރާއްޖެއިން ނިޔާވި ހަތްވަނަ މީހާއެވެ.
މިހާތަނަށް ރާއްޖެއިން 112 މީހަކު ކޮވިޑް ބަލީގައި ވަނީ ނިޔާވެފައެވެ. މިއަދަކީ މި ބަލީގައި އެންމެ ގިނަ ބަޔަކު ނިޔާވި ދުވަހެވެ. މިއަދު ކޮވިޑް ޖެހިގެން އެންމެ ފުރަތަމަ ނިޔާވީ އަންހެނަކާ ފިރިހެނެކެވެ. އެއީ ލ. އަތޮޅުންނެވެ. އެއަށް ފަހު، ތިން ވަނަ މީހަކު ނިޔާވީ މާލެއިންނެވެ. އޭގެ ފަހުން ނިޔާވި ތިން މީހުންނަކީ ވެސް ހުޅުމާލެ ކޮވިޑް ފެސިލިޓީގައި ފަރުވާ ދެމުން ދަނިކޮށް ނިޔާވި ތި މީހުންނެވެ.
މާތް ﷲ އެމައްޔިތާގެ ފުރާނައަށް ހެޔޮ ރަޙްމަތް ލައްވަވައި ފާފަ ފުއްސަވައި ސުވަރުގޭގެ މަތިވެރި ނިޢުމަތް މިންވަރު ކޮށްދެއްވާށިއެވެ. އާމީން! އަދި މި ހިތްދަތި ވަގުތުގައި ޢާއިލާއަށް ކެތްތެރިކަން ދެއްވާށިއެވެ. އާމީން!
