ޓެކްސީއެއްގައި ބާއްވައިފައި ދެވުނު ފޯނު ލިބުނީ 8 މަސް ފަހުން
ލަންޑަންގެ މި ޓެކްސީ ޑްރައިވަރު ދުނިޔެއަށް ސާބިތު ކޮށްދިނީ އަދިވެސް ދުނިޔޭގައި ތެދުވެރި އަމާނާތްތެރި އިތުބާރު ހިފޭ މީހުން އުޅޭ ކަމެވެ.
މީގެ އަށް މަސް ކުރިން އޭނާގެ ޓެކްސީން ދަތުރުކުރި އަންހެނެއްގެ ފޯނު އޭނާ ވަނީ އަމާނާތްތެރި ކަމާއެކު އެ އަންހެން މީހާއާ ހަވާލު ކޮށްފައެވެ.
" ދުނިޔޭގައި އަދިވެސް އިންސާނިއްޔަތުކަން ހުރި މީހުން އުޅޭކަން އަހަންނަށް ސާބިތުވެއްޖެ... "... އިންސާނުންގެ ތެރޭގައި ރަނގަޅު މީހުން އުޅޭކަން ހާމަވި.. އަހަރެންގެ ވަރަށް ގިނަ ތަކެތި މިގޮތަށް ގެއްލިފަ އެބަހުރި... އެކަމަކު ދުވަހަކު ވެސް އަނބުރާ ލިބޭގޮތެއް ނުވޭ... ބައެއް މީހުން އެތަކެތިން އެމީހުންގެ އަމިއްލަ ބޭނުންތައް ވެސް ކޮށްފަ އެބަހުރި...... އަހަރެން ނުދަންނަ މީހަކު އަހަންނަށް ޓަކައި ހެޔޮ ކަމެއް ކޮށްދިން ފުރަތަމަ ފަހަރު މިއީ.. އެއީ ވަރަށް ރަނގަޅު މީހެއް...." އެ ޓެކްސީން ދަތުރު އަންހެން މީހާ ކަމަށްވާ ސެޑީ ބުނެފައި ވެއެވެ.
ސެޑީ ބުނި ގޮތުގައި އެ ދުވަހު އޭނާ ވަރަށް ގިނަ ޓެކްސީތަކުން ދަތުރު ކުރިއެވެ. އެހެންކަމުން ފޯނު ގެއްލުނީ ސީދާ ކޮން ތާކަށް ކަމެއް ނޭނގުނު ކަމަށާއި ގެއަށް އައިސް އޭނާގެ ކޮޓަރިއާއި އަތް ދަބަހުގައި ވެސް ފޯނު އޮވެދާނެ ކަމަށް ހޯދި ކަމަށެވެ.
އޭނާއަށް ފޯނު ނުފެނުމުން ގެންގުޅޭ ދެވަނަ ފޯނުން އެ ފޯނަށް ގުޅި ކަމުގައި ވެސް ސެޑީ ބުންޏެވެ. އަދި ގެއްލުނު ފޯނަކީ ބެޓެރީ މައްސަލަ ޖެހިފައިވާ ފޯނެއްކަމުން ވަރަށް އަވަހަށް ނިވޭނެކަން ސެޑީއެއް އެނގެއެވެ. އޭނާ ހީކުރި ގޮތަށް ގުޅި އިރު ފޯނު އޮތީ ނިވިފައެވެ.
އެ ފޯނު ލިބޭނޭ ކަމުގެ އެއްވެސް އުއްމީދެއް ނެތިފައި ހުއްޓާ ހީވެސް ނުކުރާފަދަ ގޮތަކަށް އަނެއްކާ ވެސް ސެޑީއަށް ފޯނު ލިބުނީ ފާއިތުވެ ދިޔަ އެޕްރީލް މަހުގެ 30 ވަނަ ދުވަހު އަނެއްކާ ވެސް އޭނާއަށް އެ ޓެކްސީ އިން ދަތުރެއް ކުރެވުމުންނެވެ. އެދުވަހު ޓެކްސީ ޑްރައިވަރު ސެޑީއަށް ފޯނު ހަވާލު ކޮށްދިނެވެ. އެ ޑްރައިވަރު ވަނީ 2020 ވަނަ އަހަރުގެ އޮގަސްޓް މަހުން ފެށިގެން ސެޑީގެ ފޯނު ރައްކާތެރި ކަމާއެކު ބަލަހައްޓައިފައެވެ.
