ހަމަލައިގައި ބައިވެރިވި ފާތިޙު ހައްޔަރުކުރި އިރު ކޮވިޑަށް ފައްސި ، އެއްތާވި މީހުން ކަރަންޓީނަށް!
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ހަމަލާއާ ގުޅިގެން ބ. ދަރަވަންދޫން މިިދިޔަ ބުދަ ދުވަހުގެ ރޭ ހައްޔަރުކުރި ލ. ގަން/ދުންފިނިއުފާ، އަހްމަދު ފާތިޙު ހައްޔަރުކުރި އިރު އޭނާ ކޮވިޑް-19 އަށް ފައްސިކަން ހާމަވެއްޖެއެވެ.
"ދެން" އަށް އެނގިފައިވާ ގޮތުގައި ފާތިހު ހައްޔަރު ކުރުމަށްފަހު ފުލުހުން ވަނީ އޭނާ ކޮވިޑް-19 އަށް ޓެސްޓު ކޮށްފައެވެ. އަދި އޭނާ ކޮވިޑް-19 އަށް ފައްސިކަން ވެސް ވަނީ ޔަގީން ވެފައެވެ.
މީގެއިތުރުން ފާތިހު ކޮވިޑް-19 އަށް ފައްސިވުމާ ގުޅިގެން، ފާތިހު ހައްޔަރު ކުރުމުގެ އޮޕަރޭޝަންގައި އުޅުނު ފުލުހުންގެ އޮފިސަރުންނާއި ގާތުން އެއްތާވި (ޑައިރެކްޓް ކޮންްޓެކްޓްވި) އޮފިސަރުންތަކެއް ވެސް މިހާރު ވަނީ ކަރަންޓީނު ކޮށްފައެވެ.
މިކަމާ ގުޅޭގޮތުން "ދެން" ގެ ފަރާތުން ސުވާލު ކުރުމުން ފުލުހުންގެ މީޑިއާ އޮފިޝަލަކު ވިދާޅުވީ ކޮވިޑް ކަންތައްތައް ހަމަޖެހިފައި އޮންނަ އުސޫލުގެ މަތިން އެކަންތައްތައް ކުރަމުން އަންނަ ކަމަށެވެ.
"ފުލުހުންގެ ވަޒީފާގައި އުޅޭ ފަރާތްތައް ވެސް ފައްސި ވެފައިވާ ފަރާތަކާއި ކޮންޓެކްޓްވެ، ޑައިރެކްޓް ކޮންޓެކްޓް ވެއްޖެނަމަ މިކޮޅުން އެ އަޅަންޖެހޭ ފިޔަވަޅުތައް އަޅާ، އެކަހެރި ކުރަން ޖެހޭ ފަރާތްތައް އެކަހެރިކޮށް، ކަރަންޓީނު ކުރަންޖެހޭ ފަރާތްތައް އެ ހަމަޖެހިފައިވާ އުސޫލުގެ މަތިން ކުރަމުން ދާނީ" އޮފިޝަލު ވިދާޅުވިއެވެ.
ނަމަވެސް ފާތިޙުއާ ކޮންޓެކްޓު ވެގެން ފުލުހުންގެ އޮފިސަރުންތަކެއް ފައްސި ވެފައިވާކަމެއް ، ފުލުހުން ޔަގީން ކޮށްދެއްވާފައެއް ނުވެއެވެ.
