ކޮވިޑް-19: ހުޅުމާލެ ފެސިލިޓީގައި ސިއްޙީ އެހީތެރިން މަދު!
ކޮވިޑް-19އަށް ފަރުވާ ދޭ ހުޅުމާލޭ މެޑިކަލް ފެސިލިޓީ (އެޗްއެމްއެފް) ގައި އެކަށީގެންވާ ވަރަށް ސިއްޙީ އެހީތެރިން ނެތް ކަމަށް ބުނެފިއެވެ.
ހެލްތު އެމަޖެންސީ އޮޕަރޭޝަންސް ސެންޓަރ (އެޗްއީއޯސީ)އިން މިއަދު ހަވީރު ބޭއްވި ނޫސްވެރިންގެ ބައްދަލުވުމުގައި ހުޅުމާލޭ ހޮސްޕިޓަލުގެ ސީއީއޯ މާރިޔާ ސައީދު ވިދާޅުވީ، އެޗްއެމްއެފްގައި އެކަށީގެންވާ ވަރަށް ސްޓާފުން ނެތް ކަމަށާއި ނަމަވެސް ސްޓާފުން ތިބި މިންވަރުން އެންމެ ބޮޑަށް އެހީތެރިކަން ބޭނުންވާ މީހުންނަށް އިސްކަން ދީގެން ސްޓާފުން ބަހާލައިފައިވާ ކަމަށެވެ.
އެ ފެސިލިޓީގައި އައިސީޔޫ އެނދާއެކު ޖުމްލަ 274 އެނދު އެބަހުއްޓެވެ. އޭގެތެރެއިން އިއްޔެއާ ހަމައަށް އެޑްމިޓު ކޮށްފައިވަނީ 188 މީހުންނެވެ.
ހުޅުމާލޭ ފެސިލިޓީގައި ތިން ޑަޔަލިސިސް އެނދު ހުންނަކަމަށް ވެސް މާރިޔާ ވިދާޅުވިއެވެ.
ކޮވިޑް-19 އަށް ފައްސިވާ މީހުންނަށް ފަރުވާ ދިނުމުގެ ގޮތުން ހުޅުމާލޭގައި ހުޅުވި އެ ފެސިލިޓީގައި އެންމެ ފުރަތަމަ ޚިދުމަތް ދޭން ފެށި އިރު އެތަނުގައި މަސައްކަތް ކުރެއްވީ 19 ޑޮކްޓަރުންނެވެ. ނަމަވެސް މިހާރު އެތަނުގައި 34 ޑޮކްޓަރުންނާއި 116 ނަރުހުން މަސައްކަތް ކުރައްވައެވެ.
"ވޯޑުތަކަށް ބަހާލީމާ ސްޓޭންޑާޑަށް ވުރެ މެޑިކަލް ޕްރޮފެޝަނަލުން މަދު" މާރިޔާ ވިދާޅުވިއެވެ.
މީގެއިތުރުން މާރިޔާ ވިދާޅުވީ ހާއްސަ އެހީތެރިކަމާއި ފަރުވާ ބޭނުންވާ މީހުންނަށް އިސްކަން ދީގެން އެ ފެސިލިޓީގައި ފަރުވާގެ ކަންތައް ކުރިއަށް ގެންދާ ކަމަށާއި އެ ފެސިލިޓީގައި ތިބޭ ބަލިމީހުން ކައިރިއަށް އައިޖީއެމްއެޗުގެ ސްޕެޝަލިސްޓުން ރޫޓިންކޮށް ވަޑައިގަންނަވާ ކަމަށެވެ.
