ކޮވިޑް ފެތުރުނީ އޭޕްރީލް މަހު ދިން ލުއިތަކުގެ ސަބަބުން: ރައީސް
މިހާރު މިއޮތް ކޮވިޑްގެ ނުރައްކާތެރި ޙާލަތަށް ދިޔައީ އޭޕްރީލް މަހު ދިން ލުއިތަކުގެ ސަބަބުން ކަމަށް ރައީސް އިބްރާހިމް މުހައްމަދު ސާލިހް ވިދާޅުވެއްޖެއެވެ.
މިހާރު ބާއްވަމުންދާ ނޫސްވެރިންގެ ބައްދަލުވުމުގައި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ވިދާޅުވީ، މި ނިމިދިޔަ ދެ މަސް ދުވަހުގެ ތެރޭގައި ރެކޯޑް އަދަދަކަށް ރާއްޖެއިން ކޮވިޑް-19އަށް މީހުން ފައްސިވެފައިވާ ކަމަށާއި މިކަމުގެ ސަބަބުން ބަލިވާ ފަރާތްތަކާއި، ބައްޔަށް ފައްސިވާ މީހުންނަށް އެކަށީގެންވާ ރަނގަޅު ހިދުމަތެއް ދިނުމުގައި ދަތިތަކާ ކުރިމަތިލާން ޖެހިފައިވާ ކަމަށެވެ.
”ފާއިތުވެ ދިޔަ 2 މަސް ދުވަސް އެއީ ރާއްޖޭގައި މިހާތަނަށް ކޮވިޑަށް އެންމެ ގިނަ މީހުން ފައްސިވި 2 މަސް. މިކަމުން އަޅުގަނޑުމެން އެންމެންނަށް ވެސް އަރައިގަނެވޭނެ. ބަލިވާ މީހުންނަށް ދެވެން ޖެހޭ މިންވަރަަށް ފަރުވާ ދިނުމުގައި ދަތިތަކާ މިހާރު ކުރިމަތިލާން ޖެހިފައި މިވަނީ” ރައީސް ވިދާޅުވިއެވެ.
އެހެން ނަމަވެސް ސިއްޙީ ހިދުމަތްތެރިން އަދިވެސް ތިބީ ރައްޔިތުންނަށް ފޯރުކޮށްދޭން ޖެހޭ ހިދުމަތްތައް ފޯރުކޮށްދިނުމަށް ޓަކައި އަތުކުރި އޮޅާލައިގެން ކަމަށް ވެސް ރައީސް ވިދާޅުވިއެވެ. މީގެ އިތުރުން މާލެއާއި އަތޮޅުތެރޭގެ ރަށްރަށުގައި އަޅަން ނިންމާފައިވާ ފިޔަވަޅުތަކަށް ވެސް ރައީސް ވަނީ އަލި އަޅުއްވައިލައްވައިފައެވެ.
