އަންނަ މަހު އިތުރު ޑޮކްޓަރުންނާއި ނަރުހުން ލިބޭނެ : ރައީސް
އަންނަ މަހު ރާއްޖެއަށް ސިއްޙީ ދާއިރާއިން އިތުރު އިންސާނީ ވަސީލަތްތައް ލިބޭނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސް އޮފީހުގައި ރޭ އޮތް ނޫސްވެރިންގެ ބައްދަލުވުމުގައި ރައީސް ވިދާޅުވީ އަންނަ މަހުގެތެރޭގައި 40 ޑޮކްޓަރުންނާއި 100 ނަރުހުން ރާއްޖޭގެ ސިއްޙީ ޚިދުމަތާ ގުޅޭނެކަމަށެވެ. އަދި ހުޅުމާލޭ ފެސިލިޓީގައި ކޮންމެ 10 ބަލިމީހަކަށް މިވަގުތު ފަރުވާދެމުން ދަނީ އެއް ނަރުހަކާއި، އެއް އެހީތެރިއެއް ކަމަށާއި، މިއީ މަދު ޢަދަދެއްކަމަށް ގަބޫލުފުޅު ކުރައްވާކަމަށް ވެސް ރައީސް ވިދާޅުވިއެވެ.
“ހުޅުމާލޭ ފެސިލިޓީގައި ކޮންމެ 10 ބަލިމީހަކަށް މިވަގުތު ފަރުވާދެމުން ދަނީ ނަރުހަކާއި، އެހީތެރިއެއް. މިއީ މަދު ޢަދަދެއްކަމަށް ގަބޫލު ކުރަން. ނަމަވެސް ކުރިއަށް އޮތް ތަނުގައި އިތުރު މީހުން ލިބުމުން މިކަން ހައްލު ވެގެންދާނެކަމަށް އުންމީދުކުރަނީ” ރައީސް ވިދާޅުވިއެވެ.
މީގެ އިތުރުން ކޯވިޑަށް ފަރުވާދޭނެ ތަންތަނުގެ ދަތިކަމެއް ނެތްކަމަށާ، ދަތިކަން އޮތީ ފަރުވާދޭނެ ޚިދުމަތްތެރިންގެ ޢަދަދު މަދުވުމުގައިކަމަށް ރައީސް ވިދާޅުވިއެވެ. އަދި ސިއްހީ ޚިދުމަތްތެރީންގެ އެހީތެރިކަމާ އެކު މިހާތަނަށް ވެސް ކޮވިޑް މެނޭޖް ކުރަމުން އައީ ވަރަށް ރަނގަޅަށް ކަމަށާއި އެހެން ނަމަވެސް މިހާރު އޮތީ ދަތިކަމެއްގެ ތެރޭގައި ކަމަށް ގަބޫލުފުޅު ކުރައްވާ ކަމުގައި ވެސް އެމަނިކުފާނު ވިދާޅުވިއެވެ.
މީގެ ކުރިން ވެސް ފުރަބަންދަކާ އެކު ކޮވިޑްގެ އަދަދުތައް ދަށްކޮށް ކޮންޓްރޯލް ކުރެވުނު ކަމުގައި ރައީސް ފާހަގަ ކުރެއްވިއެވެ. އެހެން ނަމަވެސް ފުރަބަންދުގައި ރައްޔިތުންނަށާއި އިގްތިޞާދަށް ވެސް ދިމާވި ދަތިތަކަކާ ހުރެ އެ ހާލަތަށް ލުއިތަކެއް ދޭން ޖެހުނީކަމަށް އެމަނިކުފާނު ވިދާޅުވިއެވެ.
