ގދ.ތިނަދޫން އިތުުރު 8 މީހުން ފައްސިވެ، އެކްޓިވް ކޭސްތަކުގެ އަދަދު 100އަށް ވުރެ މައްޗަށް
ގދ. ތިނަދޫން އިތުރު 8 މީހުން ކޮވިޑް-19 އަށް ފައްސިވެ އެކްޓިވް ކޭސްތަކުގެ އަދަދު 100އަށް ވުރެ މައްޗަށް އަރައިފިއެވެ.
ޑރ. އަބްދުއްސަމަދު މެމޯރިއަލް ހޮސްޕިޓަލުން އެންމެ ފަހުން އާންމުކުރި ތަފާސް ހިސާބުތަކުން ދައްކާ ގޮތުގައި ތިނަދޫން މިހާރު 183 މީހުން ކޮވިޑް-19 އަށް ފައްސިވެފައިވާ އިރު، އެކްޓިވް ކޭސްގެ ގޮތުގައި 101 މީހުން އެބަތިއްބެވެ. އެ ރަށުން 82 މީހުން ބަލިން ފަސޭހަވެފައިވެއެވެ. އަދި ކޮވިޑަށް ޓެސްޓު ކުރުމަށް ނެގި ސާމްޕަލްތަކުގެ ތެރެއިން ނަތީޖާ ނުލިބި 162 ސާމްޕަލެއް ވެއެވެ.
ތިނަދޫން ފައްސި ކޭހެއް ފަހުން ފެނިފައި ވަނީ އޭޕްރީލް 24ވަނަ ދުވަހުއެވެ. އެ ދުވަހު ތިނަދޫގައި ހޯމް ކަރަންޓީނުގައި ހުރި ދެ މީހަކު ފައްސިވެފައި ވެއެވެ. އޭގެ ތެރެއިން މީހަކާ ޑައިރެކްޓް ކޮންޓެކްޓްވި ކަރަންޓީނުގައި ނެތް ފަރާތެއް ފައްސިވުމާ އެކު ތިނަދޫ ވަނީ މޮނީޓަރިންގ ހާލަތަށް ގެނެވިފައެވެ.
ތިނަދޫ ޑރ.ޢަބްދުއްޞަމަދު މެމޯރިއަލް ހޮސްޕިޓަލުން ވަނީ ރައްކާތެރިކަމުގެ ފިޔަވަޅުތައް އެޅުމަށް އާންމުންނަށް އިލްތިމާސްކޮށްފައެވެ. އަދިކޮންޓެކްޓް ޓްރޭސިންއާ ގުޅޭ އެއްވެސް މައުލޫމާތެއް ހިއްސާ ކުރައްވަން ބޭނުންފުޅު ނަމަ ތިނަދޫ ކޮވިޑް ހޮޓްލައިން ނަންބަރު 7934641 އާ ގުޅުއްވައި މައުލޫމާތު ހިއްސާ ކުރެއްވުމަށް ވެސް އެ ހޮސްޕިޓަލުން އެދެއެވެ.
ތިނަދޫގައި ކޮވިޑް-19 ގެ ހާލަތު ގޯސްވެފައިވުމާ ގުޅިގެން އެ ރަށުގައި ވެސް މިވަގުތު ވަނީ ކާފިއު އިއުލާނު ކޮށްފައެވެ.
