ދަރިފުޅުގެ ގާތިލަށް މާފު ކުރީ މަރުގެ ހުކުމް ތަންފީޒު ކުރަން ހިނދުކޮޅަކަށް ވެފައި ވަނިކޮށް
މަރުގެ ހުކުމް ތަންފީޒު ކުރަން ހިނދުކޮޅަކަށް ވެފައިވަނިކޮށް، ބައްޕައަކު އޭނާގެ ދަރިފުޅުގެ ގާތިލަށް މާފުދީ މަރުން ސަލާމަތްކޮށްދީފިއެވެ.
ސައުދީ އަރަބިއްޔާގައި ހިނގާދިޔަ މިހާދިސާގައި މީގެ ފަސް އަހަރު ކުރިން ދަރިފުޅު މަރައިލި ގާތިލަށް، މަޢާފު ދީފައި ވަނީ އަވަދް އަލްއިމްރާނީ ކިޔާ މީހެކެވެ. އިމްރާނީ އޭނާގެ ދަރިފުޅުގެ ގާތިލަށް މާފު ދިނުމާ އެކު، ގާތިލް ވަނީ މާތް ﷲއަށް ހަމްދުކޮށް ރޯން ފަށައިފައެވެ.
ސޯޝަލް މީޑިޔާގައި ދައުރުވަމުން އަންނަ ވީޑިޔޯއަކުން ފެންނަ ގޮތުގައި، އިމްރާނީގެ ދަރިފުޅުގެ ގާތިލަށް މާފު ދިނުމުން އޭނާގެ އާއިލާއާއި އެކުވެރިން ވަނީ އޭނާގެ ނިންމުމަށް މަރުހަބާ ކިޔާފައެވެ. އަދި މަރުގެ ހުކުމް ތަންފީޒު ކުރާތަނަށް ގޮސް ތިބި ގާތިލުގެ އާއިލާއާއި އެކުވެރިން ވެސް އިމްރާނީގެ ނިންމުމަށް މަރުހަބާ ކިޔައި ގާތިލަށް އައު ދިރިއުޅުމެއް ލިބުނީތީ މާތްﷲއަށް ހަމްދުކޮށްފައިވެއެވެ.
ރިޕޯޓްތައް ބުނާގޮތުގައި ގާތިލްގެ އާއިލާއިން އިމްރާނީ ފަރާތުން ގާތިލަށް މާފުދީ އައު ދިރިއުޅުމެއް ހޯދައި ދިނުމަށް އެތައް ފަހަރަކު ވަނީ އެދިފައެވެ. އިމްރާނީގެ ނިންމުމާ އެކު، ގާތިލް ވަނީ މަގުމަތީގައި ޝުކުރުގެ ސަޖިދައެއް ވެސް ކޮށްފައެވެ.
