ކޮރޯނާ ވައިރަަސް ޖެހިފައިވާ އިތުރު ތިން މީހަކު މެލޭޝިޔާއިން ފެނިއްޖެ
ހަލުވިކަމާއެކު ފެތުރެމުން އަންނަ ކޮރޯނާ ވައިރަަސް ޖެހިފައިވާ އިތުރު ތިން މީހަކު މެލޭޝިޔާއިން ފެނިއްޖެ އެވެ.
މެލޭޝިއާގެ ހެލްތު ޑިރެކްޓަރ ޖެނެރަލް ޑރ. ނޫރް ހިޝާމް އަބްދުﷲ މިއަދު ހެނދުނު ވިދާޅުވީ މި ބައްޔަށް ޕޮޒިޓިވްވި އިތުރު ތިން މީހުންގެ ތެރޭގައި ހިމެނެނީ ހަތަރު އަހަރުގެ ކުއްޖަކާއި، އަންހެނެއްގެ އިތުރުން 52 އަހަރުގެ ފިރިހެނެއް ކަމަށެވެ.
މީގެތެރެއިން އަންހެން މީހާގެ ދެ ކުދިން ވެސް މި ބައްޔަށް މީގެކުރިން ޕޮޒިޓިވް ވެފައިވާއިރު އޭނާގެ ގަޔަށް މި ބަލި އެރީ އެމީހުންގެ ފަރާތުންނެވެ. މި ތިން މީހުންނަށް ވެސް މިހާރު ދަނީ މެލޭޝިއާގެ ހޮސްޕިޓަލުތަކުގައި ގާއިމުކޮށްފައިވާ އައިސޮލޭޝަން ފެސިލިޓީސްތަކުގައި ފަރުވާ ދެމުންނެވެ.
މި ތިން މީހުންނާއެކު މެލޭޝިއާ އިން މި ބައްޔަށް ޕޮޒިޓިވްވި މީހުންގެ އަދަދު މިހާރު ވަނީ ހަތަކަށް އަރާފައެވެ. މި އެންމެންނަކީ ވެސް ޗައިނާ އަށް ނިސްބަތްވާ މީހުންނެވެ.
ޗައިނާގެ އިތުރުން އެހެން ގައުމުތަކުން ވެސް މި ބަލި ޖެހިފައިވާ މީހުން ފެންނަމުންދާއިރު، މި ބަލީގައި މިހާތަނަށް ވަނީ 132 މީހަކު މަރުވެފައެވެ. މި ބަލީގައި މިހާތަނަށް މަރުވެފައިވާ އެންމެންނަކީ ވެސް ޗައިނާ މީހުންނެވެ.
Ads by STO
