ބެރިއެއްގެ ދަށުވި ކުޑަ ކުއްޖާގެ އެއް އަތާއި އެއް ފައި ވަނީ ބިންދައިގެން ގޮސްފައި ،އައިޖީއެމްއެޗްގައި ފަރުވާ ދެނީ
ލ. ފޮނަދޫ ގެއެއްގެ ބޭރު ފާރުގެ ބެރިއެއް ވެއްޓި ޒަހަމްވި ކުޑަ ކުއްޖާގެ އެއް އަތާއި އެއް ފައި ބިންދައިގެން ގޮސްފައިވާ ކަމަށް މައުލޫމާތު ލިބިއްޖެއެވެ.
ގަމު ރީޖަނަލް ހޮސްޕިޓަލްގެ މެނޭޖަރ އަލީ ނަޝީދު "ދެން" އަށް މައުލޫމާތު ދެއްވަމުން ވިދާޅުވީ، ބެރިއެއްގެ ދަށުވެގެން އިއްޔެ ހަވީރު އެ ހޮސްޕިޓަލަށް ގެންދިޔަ އުމުރުން 14 އަހަރުގެ ފިރިހެން ކުއްޖެއްގެ އެއް އަތާއި އެއް ފައި ބިންދައިގެން ގޮސްފައިވާ ކަމަށެވެ.
އެހެންކަމުން އެ ކުއްޖާ އިތުރު ފަރުވާއަށް އައިޖީއެމްއެޗްއަށް ރޭގެ ވަގުތެއްގައި ފޮނުވާލާފައިވާ ކަމަށް ވެސް ނަޝީދު ވިދާޅުވިއެވެ.
މިކަމާ ގުޅިގެން "ދެން" އަށް މައުލޫމާތު ދެއްވަމުން އައިޖީއެމްއެޗްގެ މީޑިއާ އޮފިޝަލު ވިދާޅުވީ، އެ ކުއްޖާ އޮތީ ކުޑަ ކުދިންގެ ވޯޑުގައި ކަމަށާއި އޭނާގެ ސާޖަރީއެއް ވެސް ކުރަން ހަމަޖެހިފައިވާ ކަމަށެވެ. އިތުރު ތަފްސީލެއް އަދި ލިބިފައެއް ނުވެއެވެ.
އެނގިފައިވާ ގޮތުގައި ވެއްޓިފައި ވަނީ ކަރަންޓީނުގައި ހުރި ގެއެއްގެ ބެރިއެކެވެ.
"މަތީގައި އަޅައިފައި އޮންނަ ކޮންކްރީޓް ބެރިއެއް ބިނދިގެން ވެއްޓި އެ ކުއްޖާ އޭގެ ދަށުވީ. އަނގައިން ވެސް ހުރީ އައިސްފަ. އެތަނުގައި ތިބި މީހުންނަށް ކުއްޖާގެ ގައިމަތިން ބެރި ނުނެގިގެން، އެހެން މީހުންނަށް ގޮވާ ގެނެސް އޭތި ނަގާފަ ކުއްޖާ ނެގީ، ފުދޭ ވަރަކަށް އިރުވި ފަހުން ނެގުނީ" އިއްޔެ ހަވީރު ހިނގި އެ ހާދިސާއާއި ގުޅިގެން "ދެން" އަށް މައުލޫމާތު ދިން މީހަކު ބުންޏެވެ.
އޭނާ ބުނީ ކުއްޖާގެ ހޭ ހުރި ކަމަށާއި އަނގައިންނާއި އަތުން ވެސް ލޭ އައިސްފައި ހުރިކަމަށެވެ.
Ads by STO
