ކޮވިޑް-19 ގެ އުސޫލާ ޚިލާފަށް 9 ބިދޭސީއަކު ފުލުހުންގެ ޖިޕުގައި ގެންދިޔަ ކަމަށް ބުނާ މައްސަލައެއް

ކޮވިޑް-19އާ ގުޅިގެން ކަނޑައަޅާފައިވާ އުސޫލުތަކާ ޚިލާފަށް 9 ބިދޭސީއަކު ފުލުހުންގެ ޖިޕުގައި ގެންދިޔަ ކަމަށް ބުނާ މައްސަލައެއް ފެންމަތިވެއްޖެއެވެ.

Ads by STELCO

ޓިކްޓޮކްގައި މީހަކު އާންމުކޮށްފައިވާ ވީޑިއޯއަކުން ފެންނަ ގޮތުގައި 9 ބިދޭސީއަކު ފުލުހުންގެ ޖިޕަށް އަރުވައިގެން ގެންދާ މަންޒަރު ފެނެއެވެ. ވީޑިއޯއިން ފެންނަ ގޮތުގައި އެ ބިދޭސީންގެ މެދުގައި 3 ފޫޓު ދުރުމިން ނުހުންނާނެތީ، ބައެއް މީހުން ވަނީ އެކަމާ ކަންބޮޑުވުން ފާޅުކޮށް، ފުލުހުންނަށް ފާޑު ކިޔައިފައެވެ.

މިކަމާ ގުޅޭގޮތުން "ދެން" ގެ ފަރާތުން ސުވާލު ކުރުމުން ފުލުހުންގެ މީޑިއާ އޮފިޝަލަކު ވިދާޅުވީ، ދިވެހި ރާއްޖޭގައި ޤަވާއިދާ ޚިލާފަށް އުޅޭ ބިދޭސީން އަނބުރާ ޤައުމަށް ފޮނުވާލުމަށް ފުލުހުންނާއި އިމިގްރޭޝަންގެ އިތުރުން އިކޮނޮމިކް މިނިސްޓްރީން ދަނީ މަސައްކަތްތަކެއް ކުރަމުން ކަމަށެވެ.

އެގޮތުން މިދުވަސްވަރު ހުއްދަ ނެތި ބޭރުގައި އުޅޭ ބިދޭސީންގެ ތެރެއިން، ދިވެހިރާއްޖޭގައި ޤަވާއިދާ ޚިލާފަށް އުޅޭ ބިދޭސީން ފުލުހުންގެ ބެލުމުގެ ދަށަށް ގެންގޮސް، އިމިގްރޭޝަނާ ހަވާލު ކުރަމުން ގެންދާނެ ކަމަށް ވެސް އޮފިޝަލު ވިދާޅުވިއެވެ.

"އެގޮތަށް ބެލުމުގެ ދަށަށް ގެންނަ ބިދޭސީން ފުލުހުންގެ ވެހިކަލަށް އަރުވައިގެން ގެންދަނީ، ވެހިކަލުގައި ޖާގަ އޮންނަ ވަރަށް ބަލައިގެން. ކޮންމެ ދެ މީހެއްގެ ދެމެދުގައި 3 ފޫޓުގެ ޖާގަ ނެތް ކަމުގައިވިޔަސް އެކަކު އަނެކަކާ އެހާ ކައިރިއަކު ވެސް ނޫން ތިބޭނީ" ވެހިކަލަށް އަރުވައިގެން ގެންދާ އުސޫލާ ގުޅޭގޮތުން ސުވާލުކުރުން ފުލުހުން ވިދާޅުވިއެވެ.

ފުލުހުން އިތުރަށް ވިދާޅުވީ، މިއީ ކޮވިޑް-19 ގެ ހާލަތު ގޯސްވެފައިވާ ދުވަސް ވަރަކަށްވުމާ އެކު ބިދޭސީން ވެހިކަލަށް އަރުވައިގެން ގެންދިޔުމުގައި ފުލުހުން ވެސް އުސޫލުތަކަށް ބައްލަވާ ކަމަށެވެ.