މުސްލިމަކު ކާފަރަކަށް ހެދުން ކުށަކަށް ހަދައި ބޮޑެތި އަދަބުތަކެއް ހިމެނޭ ބިލު މަޖިލީހަށް!

އާންމު ތަނެއްގައި މުސްލިމަކު ކާފަރެއްގެ ގޮތުގައި ސިފަ ކުރުމާއި ސިފަކުރުމުގައި ބައިވެރިވުމުގެ އިތުރުން، މުސްލިމަކަށް ކާފަރެއް ކަމުގައި ތުހުމަތު ކުރުމަކީ ވެސް ކުށަކަށް ހަދައި އެކަމަށް ބޮޑެތި އަދަބުތައް ކަނޑައަޅައި، އިސްލާހު މަޖިލީހަށް ހުށަހަޅައިފިއެވެ.

Ads by MWSC

ރައްޔިތުން މަޖިލީހަށް މި އިސްލާހު ހުށަހަޅައިފައި ވަނީ ތުޅާދޫ ދާއިރާގެ މެމްބަރު ހިސާން ހުސައިންއެވެ. މަޖިލީހުގެ ގާނޫނުލް އުގޫބާތަށް މި ބިލް އިސްލާހު ކުރުމަށް ހުށަހަޅައިފައިވާއިރު، އެއީ ނަފްރަތުގެ އަމަލެއް ހިންގުން ކުށަކަށް ހަދަން އިތުރުކުރާ މާއްދާއެއް ކަމަށެވެ. އަދި އެ ބިލުގައި ނަފްރަތުގެ އަމަލުތަކުގެ ގޮތުގައި ގިނަ ކަންތައްތަކެއް ވަނީ ހިމަނައިފައެވެ.

އެގޮތުން މީހެއްގެ ނަސްލަށް، އުފަންވީ ގައުމަށް ނުވަތަ ކުލަޔަށް ބަލައި ދެވޭ އަނިޔާއެއްގެ ސަބަބުން މީހަކު މަރުވެއްޖެ ނަމަ އެ ކުށް ކުރާ މީހާއަށް އެންމެ ބޮޑުވެގެން 25 އަހަރުގެ ޖަލު ހުކުމެއް އަންނާނެ ކަމަށާއި، ހަމަ އެ ގޮތަށް ރަހީނުކޮށް ޖިސްމާނީ އަނިޔާއެއް ނުވަތަ މީހަކަށް ޖިންސީ އަނިޔާއެއް ދީގެން ނުވަތަ މީހެއްގެ ފުރާނަޔަށް ގެއްލުންދޭނެ ކަމުގެ ބިރުދައްކައިފި ކަމުގައި ވާނަމަ އެންމެ ބޮޑުވެގެން 15 އަހަރުގެ ޖަލު ހުކުމެއް އަންނާނެ ކަމަށް އެ ބިލުގައި ވަނީ ބުނެފައެވެ.

އިސްލާމް ދީނަށް ހަޖޫ ޖަހައި ދީނާ ދެކޮޅަށް ވާހަކަ ދައްކާ މީހުންނަށް ރައްދެއްގެ ގޮތުގައި ދީނީ ޢިލްމުވެރިޔާ ޑރ. މުޙައްމަދު އިޔާޒް ޢަބްދުއްލަތީފް ވަނީ ޓުވީޓުތަކެއް ކުރައްވައިފައެވެ. އެ ގޮތުން ޑރ.އިޔާޒްގެ ޓުވީޓެއްގައި ވިދާޅުވެފައި ވަނީ، އިސްލާމްދީނަށް ފުރައްސާރަކޮށް ހަޖޫ ޖަހައި ކުފުރު ވުމަކީ އިސްލާމްދީނުގެ ހައްދު ކަނޑައެޅިގެންވާ ކަމެއް ކަމަށެވެ. އަދި އެއީ ދިވެހިރާއްޖޭގެ ގާނޫނުގައި ވެސް ކުށެއް ކަމަށާއި، އެކަން ފާޅުގައި މީހަކު ކުރަމުން އަންނަ ނަމަ ފާޅުގައި އެވާހަކަ ބުނަން ވެސް ޖެހޭނެ ކަމަށް ޑރ އިޔާޒް ކުރެއްވި ޓްވީޓުގައި ވިދާޅުވެފައިވެއެވެ.

ޑރ އިޔާޒް ކުރެއްވި އެހެން ޓުވީޓެއްގައި ވިދާޅުވެފައި ވަނީ، މީހެއްގެ ފަރާތުން އިސްލާމްދީނާ ޚިލާފު އަމަލުތަކެއް ފެނި، އެކަންތައް ފަތުރަން މަސައްކަތް ކުރާއިރު، އެކަމާ އަޅައިނުލާ ހަނު ހުރުމަކީ ވަރަށް ބޮޑު ޚިޔާނާތެއް ކަމަށެވެ.

ޑރ.އިޔާޒް އިތުރަށް ކުރެއްވި ޓުވީޓެއްގައި ވިދާޅުވެފައި ވަނީ، ޤާނޫނާއި ގަވައިދު ހަދަނީ ވަކި ފަރުދަކު ހިމާޔަތް ކުރަން ކަމުގައި ވެގެން ނުވާނެ ކަމަށެވެ. އަދި ސުޕާ މެޖޯރިޓީ ލިބިފައި އޮތް ނަމަވެސް އެއަށް ވުރެ ބާރު ހުރި ފަރާތްތައް ފުނޑިގެން ދިޔަކަން ހަނދާން ކުރައްވަން ވާނެ ކަމަށާއި، ނޫނީ ހިތާމަ ކުރުމުން ފައިދާ ނުކުރާ ވަގުތެއްގައި ހިތާމަ ކުރަން ޖެހިދާނެ ކަމަށް ވިދާޅުވެ، ޑރ އިޔާޒް ވަނީ ސަރުކާރަށް ވެސް ފާޑު ވިދާޅުވެފައެވެ.