ޑޮނާލްޑް ޓްރަންޕް އަނބުރާ ފޭސްބުކް އަދި އިންސްޓަގްރާމަށް
ޖެނުއަރީ 6 ވަނަ ދުވަހު ފޭސްބުކް އަދި އިންސްޓަގްރާމްއިން ބޭރުކޮށްލި، އެމެރިކާގެ ކުރީގެ ރައީސް ޑޮނަލްޑް ޓްރަންޕްގެ ފޭސްބުކް އަދި އިންސްޓަގްރާމް އެކައުންޓް މި ދެ މަންސަތަކުން ފެންނަން ފަށައިފިއެވެ.
މިހާރު ފޭސްބުކް އަދި އިންސްޓަގްރާމްގައި ވެސް ޓްރަންޕްގެ ޕޭޖް އަދި ހޭންޑަލް ފެނެއެވެ. ނަމަވެސް ޓްރަންޕަށް ޕޯސްޓް ކުރެވޭނެކަން ނުވަތަ ނޫންކަން އަދި ޔަޤީނެއް ނޫނެވެ. ފޭސްބުކްއިން މިކަމާ ގުޅޭ ގޮތުން މިހާތަނަށް އެއްވެސް އެއްޗެއް ހާމަކޮށްފައެއް ނުވެއެވެ.
ޓްރަންޕް ފޭސްބުކް އަދި ފޭސްބުކް ކުންފުނީގެ ދަށުން ހިންގަމުން އަންނަ އިންސްޓަގްރާމްއިން ބޭރުކޮށްފައި ވަނީ، ނޮވެމްބަރު މަހުގެ ތެރޭގައި ބޭއްވި ރިޔާސީ އިންތިހާބުގެ ނަތީޖާއާ ބެހޭ ގޮތުން ސައްހަ ނޫން ދޮގު މައުލޫމާތުތައް ފަތުރާ ކަމަށް ބުނެއެވެ. އަދި މީގެ އިތުރުން އެމެރިކާގެ ޤާނޫނު ހަދާ މަޖިލީސް، ކެޕިޓޮލްގެ ތެރެއަށް ޓްރަންޕްގެ ސަޕޯޓަރުން މި އަހަރު ޖެނުއަރީ މަހުގެ ތެރޭގައި ވަދެގަތީ ޓްރަންޕްގެ ހިތްވަރު ދިނުމުގެ މެސެޖްތަކުގެ ސަބަބުން ކަމަށް ވެސް ފޭސްބުކްއިން ވަނީ ނިންމައިފައެވެ. ކެޕިޓޮލްގެ ތެރެއަށް ޓްރަންޕްގެ ސަޕޯޓަރުން ވަދެގަތީ، އިންތިޚާބު އޮޅުވާލި ކަމަށް ބުނެއެވެ. ޓްރަންޕް ވަނީ އެ ތަނަށް ދިޔަ މީހުންނަކީ ބަދަތަލުން ތަކެއް ކަމަށް ސިފަކޮށްފައެވެ.
ފޭސްބުކް އަދި އިންސްޓަގްރާމްއިން ޓްރަންޕް ބޭރު ކުރަން ނިންމީ، 9،000އަށް ވުރެ ގިނަ ޝަކުވާތައް ބެލުމަށް ފަހުގައެވެ. ފޭސްބުކާއި އިންސްޓަގްރާމްގެ އިތުރުން ޖެނުއަރީ މަހު ޓްވިޓާ އާއި ޔޫޓިއުބްގެ އިތުރުން ސްނެޕްޗެޓުން ވެސް ޓްރަމްޕް ބޭރުކޮށްފައިވެއެވެ. ޓްރަންޕް އޭގެ ފަހުން އޭނާގެ ޝުޢޫރުތައް ހާމަކުރަމުން ދަނީ ބްލޮގެއްގައެވެ.
ޓްރަންޕްގެ ޕޭޖް ފޭސްބުކްއިން ފެންނަން ފަށައިފައި މިވަނީ، ޓްރަމްޕްގެ އެކައުންޓްތައް ބްލޮކްކުރި މައްސަލައިގައި އެކައުންޓްތައް އަލުން އިޔާދަކޮށްދިނުމަށް ހުށަހެޅި މައްސަލައެއް ފޭސްބުކްގެ އޯވަސައިޓް ބޯޑުން ބަލާފައިވަނިކޮށެވެ. މިމައްސަލައިގައި އެބޯޑުން ނިންމާފައި ވަނީ އެކައުންޓްތައް ބްލޮކް ކުރީ ޤަވާއިދުގެ ތެރެއިން ކަމަށާއި އަދި ބްލޮކް ދަމަހައްޓަން ފެންނަ ކަމަށެވެ. މި ނިންމުން ނިންމާފައި ވަނީ ބޯޑުގެ 5 މެންބަރުންގެ އަޣްލަބިއްޔަތުންނެވެ.
Ads by STO
