އަންމަޓީގެ ބަންދަށް އަށް ދުވަސް ޖަހައިފި!
ހުޅުމާލޭގައި ފްލެޓުތަކެއް އަޅައިދޭނެ ކަމަށް ބުނެ އެތައް ބައެއްގެ އަތުން މަކަރާއި ހީލަތުން ފައިސާ ހޯދުމަށް ފަހު ފިލައިގެން އުޅެނިކޮށް ހައްޔަރުކުރި ސީލައިފް ކުންފުނީގެ މެނޭޖިން ޑިރެކްޓަރު ވ. ތިނަދޫ، ރެޑްހައުސް، އަހްމަދު މޫސާ (އަންމަޓީ)ގެ ބަންދަށް އަށް ދުވަސް ޖަހައިފިއެވެ.
އައްމަޓީގެ ބަންދަށް އިތުރު އަށް ދުވަސް ޖަހައިފައި ވަނީ އޭނާގެ ބަންދުގެ މުއްދަތު މުރާޖައާ ކުރަން އިއްޔެ ކްރިމިނަލް ކޯޓަށް ގެންދިއުމުންނެވެ.
އޭނާގެ ޝަރީއަތް ނިމެންދެން ބަންދުކޮށްދިނުމަށް ޕްރޮސެކިއުޓާ ޖެނެރަލް (ޕީޖީ) އޮފީހުން ކޯޓުގައި ވަނީ އެދިފައެެވެ. އެހެން ނަމަވެސް މައްސަލަ ބަންދު މުރާޖައާ ކުރި މަޖިލީހުގައި އިންނެވީ މައްސަލަ ބައްލަވާ ފަނޑިޔާރު ނޫން ކަމަށްވާތީ ގާޒީ އާދަމް މުހައްމަދު ނިންމެވީ އަށް ދުވަސް ދިނުމަށެވެ. އަދި އޭނާގެ މައްސަލަ ބައްލަވާނެ ފަނޑިޔާރެއް ކަނޑައެޅިފައި ނުވާ ކަމަށް ވެސް ވިދާޅުވިއެވެ.
ޕްރޮސެކިއުޓާ ޖެނަރަލްގެ އޮފީހުން އަންމަޓީގެ މައްޗަށް 42 ދައުވާއެއް އުފުލުމަށް މިދިޔަ މަހުގެ 30 ވަނަ ދުވަހު ކްރިމިނަލް ކޯޓަށް މައްސަލަ ފޮނުވާފައިވެއެވެ. އެ ދައުވާތައް އަންމަޓީގެ މައްޗަށް ސާބިތުވެއްޖެ ނަމަ 65 އަހަރުގެ ޖަލު ހުކުމެއް އޭނާގެ މައްޗަށް އިއްވާނެއެވެ.
