އެހެންމީހަކު ޖާމިނު ކުރުމަށް ފަހު ރާއްޖެއިން ބޭރަށް ނުދެވޭ ގޮތަށް ހަމަޖައްސައިފި
އެހެން މީހަކު ޖާމިނު ކުރުމަށް ފަހު ރާއްޖެއިން ބޭރަށް ނުފުރޭ ގޮތަށް ހަމަޖައްސައިފިއެވެ.
ޝަރީއަތް ކުރުމާބެހޭ ޖިނާއީ އިޖްރާއަތުގެ ގަވާއިދު ކުރިން އޮންނަ ގޮތުން ޖިނާއީ ދައުވާއެއް އުފުލިފައިވާ މީހަކު ރާއްޖެއިން ބޭރަށް ދާން ބޭނުންވާ ހާލަތުގައި އޭނާ އަނބުރާ އަންނާނެ ކަމުގެ ޔަގީންކަން ދިނުމުގެ ގޮތުން އެހެން މީހަކު ޖާމިނު ކުރުމަށް ފަހު ފުރިދާނެއެވެ. އެހެން ނަމަވެސް ޖިނާއީ އިޖްރާއަތުގެ ގާނޫނުގައި މީހުން ޖާމިނު ކުރެވޭ ގޮތަށް އޮންނަނީ ބަންދުގައި ތިބޭ މީހުން ބަންދުން ދޫކޮށްލުމުގައި އެކަންޏެވެ.
ޝަރީއަތް ކުރުމާބެހޭ ޖިނާއީ އިޖްރާއަތުގެ ގަވާއިދު މުރާޖާ ކުރުމަށް ފަހު އެ ގަވާއިދަށް މިދިޔަ އަންގާރަ ދުވަހު ސުޕްރީމް ކޯޓުން ވަނީ ބަދަލުތަކެއް ގެނެސްފައެވެ. އެ ގޮތުން، ޖާމިނު ކުރުވުމަށް ފަހު ފުރަން ހުއްދަ ދެވޭ މާއްދާ އެ ގަވާއިދުން ވަނީ އުނިކޮށްފައެވެ. އެހެން ނަމަވެސް ބަންދުން ދޫކޮށްލުމުގައި މީހުން ޖާމިނު ކުރެވޭ މާއްދާ މިފަހަރު ވެސް ހިމަނައިފައި ވެއެވެ.
ސުޕްރީމް ކޯޓުން އެ ބަދަލު ގެނައީ ކުރީގެ ޓޫރިޒަމް މިނިސްޓަރު އަލީ ވަހީދުގެ މައްޗަށް ޖިންސީ ގޯނާއާއި ރޭޕްގެ ދައުވާތަކެއް އުފުލާފައި ވަނިކޮށް ޔޫތު މިނިސްޓްރީގެ ސްޓޭޓް މިނިސްޓަރު އަސްހަދު އަލީ (އަޑުބަރޭ) ޖާމިނު ކުރުވުމަށް ފަހު އޭނާ ރާއްޖެއިން ބޭރަށް ދާން ކްރިމިނަލް ކޯޓުން ހުއްދަ ދީފައިވަނިކޮށެވެ.
އަލީ ވަހީދު ފުރަން ކްރިމިނަލް ކޯޓުން ހުއްދަ ދިން މައްސަލަ ދައުލަތުން އިސްތިއުނާފް ކުރި ނަމަވެސް، އަލީ ވަހީދު މިހާރު އުޅޭ ތަނެއް ނޭނގޭތީ އެ މައްސަލަ އޮތީ ކުރިއަށް ނުގެންދެވިފައެވެ. ދައުލަތުން ވިދާޅުވީ އަލީ ވަހީދު މިހާރު ހުންނެވި ގައުމެއް ނެނގޭ ކަމަށެވެ. އެހެންވެ، ދައުލަތުން މިހާރު ވަނީ އަޑުބަރޭއަށް ފިޔަވަޅު އަޅަން ކްރިމިނަލް ކޯޓުގައި އެދިފައި ކަމަށެވެ.
ބޭކާރު ވާހަކަ ދައްކާނެ،ކަމެއް ނެތް. ބޭނުން މީހަކު. ބޭނުން އިރަކު. ބޭނުން ކަމެއް. ބޭނުން ގޮތެއް. ތިޔަ ކަމަކީ ސަރުކާރު ނުރުހޭ މީހަކަށް ތިޔަ ކަހަލަ ފުރުސަޠެއް ހޯދުމަށް އެދުނީމަ، ނުދޭން ވެގެން ޤަވަޢިދަށް ބަދަލެއް ގެނައީ. ހުސް ޑްރާމާ.