ރާއްޖޭގައި އިންޑިއާގެ ކޮންސިއުލޭޓަށް އެޅުމާ ދޭތެރޭގައި ވިސްނާނަން
އައްޑޫގައި އިންޑިއާގެ ކޮންސިއުލޭޓަށް އަޅަން އިންޑިއާއިން ހުށަހަޅައިފައި ވަނީ ޑިޕްލޮމެޓިކް ގުޅުމުގެ ތެރެއިން ކަމަށާއި އެ ހުށަހެޅުމާ ދޭތެރޭގައި ރާއްޖެއިން ވިސްނާނެކަަމަށް ރައީސުލް ޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެެވެ.
މިއަދު ކުރިޔަށް ދިޔަ ނޫސްވެރިންގެ ބައްދަލުވުމުގައި ނޫސްވެރިޔަކު ކުރެއްވި ސުވާލަކަށް ޖަވާބު ދެއްވަމުން ރައީސް ޞާލިޙް ވިދާޅުވީ، މިހައިތަނަށް އިންޑިއާގެ ކޮންސިއުލޭޓެއް އުފެއްދުމާ މެދުގައި ވަކި ގޮތެއް ނިންމަވައިފައި ނުވާ ކަމަށެވެ. އަދި މަޝްވަރާ ކުރުމަށް ފަހު މިކަމުގައި ގޮތެއް ނިންމަވާނެ ކަމަށް ރައީސް ވިދާޅުވިއެވެ.
"ޑިޕްލޮމެޓިކް ގުޅުންތައް ޤާއިމްވެފައި އޮންނަ ދޭދޭ ޤައުމުތަކުގެ ދެމެދުގައި މިކަހަލަ ކަންތައްތައް ކުރަމުންދޭ. އެ އުސޫލުން އިންޑިއާ ސަރުކާރުން އެ ހުށަހަޅުއްވަނީ. އަޅުގަނޑުމެން ޖެހޭނެ މިކަމާ މެދުގައި މަޝްވަރާކޮށްފައި ގޮތެއް ނިންމަން. އަދި މިހާތަނަށް އަޅުގަނޑުމެން ގޮތެއް ނުނިންމަން" ރައީސް ޞާލިޙް ވިދާޅުވިއެވެ.
ރައީސް ޞާލިހް ވިދާޅުވީ، ރާއްޖޭގެ ކޮންސިއުލޭޓްވެސް ބޭރުގެ ދެ ޤައުމެއްގައި ހުންނާނެ ކަމަށާއި މިގޮތުން އިންޑިއާ އަދި ސައުދީގައި ރާއްޖޭގެ ކޮންސިއުލޭޓް ހުންނާނެ ކަމަށެވެ. ސައުދީގެ ރިޔާދްގައި ދިވެހި އެންބަސީއެއް ހުންނައިރު، ރިޔާދްގައި ކޮންސިއުލޭޓަށް ހުންނަކަން ފާހަގަ ކުރައްވައި ރައީސް ވިދާޅުވީ، މިއީ ޑިޕްލަމެޓިކް ގުޅުމުގެ ތެރެއިން ކުރާ ކަންކަން ކަމަށެވެ.
އައްޑޫގައި އިންޑިއާގެ ކޮންސިއުލޭޓަށް ޤާއިމް ކުރަން ނިންމާފައިވާކަން އެންމެ ފުރަތަމަ ރިޕޯޓްކޮށްފައި ވަނީ އިންޑިއާގެ ނޫހަކުންނެވެ. ސިޔާސީ އެކި ބޭފުޅުން އިންޑިއާގެ ކޮންސިއުލޭޓާ އެއްކޮޅަށް ވާހަކަ ދެއްކެވި ނަމަވެސް އާންމުންގެ ގިނަ ބަޔަކު ދަނީ އެކަމާ ދެކޮޅުހަދަމުންނެވެ. އަދި މިކަމާ ދެކޮޅަށް ސޯޝަލް މީޑިއާ ކެމްޕެއިނެއް ފަށައި ޕެޓިޝަނެއްގައި ސޮއި ކުރަން ފަށައިފައި ވެއެވެ. މީގެ އިތުރުން "ސޭވް އައްޑޫ"ގެ ނަމުގައި މިކަމާ ދެކޮޅަށް ކެންޕެއިނެއް ވެސް އެބަހިންގައެވެ.
Ads by STO
