ފާޑުކިޔުންތަކަށް ޢަބްދުއްރާޒިޤްގެ ރައްދު: ޓިކްޓޮކްއަކީ މިޔުޒިކް ލާން މަޖުބޫރު އެއްޗެއް ނޫން!
ބޮޑުބެރު ޖެހުމުން ކުރިން ލިބުނު މަޝްހޫރުކަން ދޫކޮށްލާ، މާތް ވެގެންވާ އިސްލާމްދީނަށް ޓަކައި މިޔުޒިކާ ދުރަށް ދިޔަ ޢަބްދުއްރާޒިޤް ޢަލީ ޓިކްޓޮކްގައި އޭނާގެ އަމިއްލަ އެކައުންޓެއް ހުޅުވުމުން ބަޔަކު ފާޑު ކިޔައިފިއެވެ.
އެމީހުން ބުނެފައި ވަނީ ޢަބްދުއްރާޒިޤް ފަދަ މީހުން ޓިކްޓޮކްގައި އުޅުމުން ހައިރާންވާ ކަމަށާއި މިޔުޒިކަކީ ހަރާމް އެއްޗެއް ކަމަށް ބުނި ނަމަވެސް މިޔުޒިކް ހިމެނޭ ޓިކްޓޮކްއަށް އޭނާ އައިސްގެން އުޅޭ ކަމަށެވެ. އަދި މިޔުޒިކް އަޑުނާހައި ޓިކްޓޮކް ބޭނުން ނުކުރެވޭނެ ކަމަށް ވެސް އެމީހުން ބުނެފައިވެއެވެ.
އެ މީހުންނަށް ރައްދު ދެމުން ފޭސްބުކް ޕޭޖް މެދުވެރިކޮށް އޭނާ ބުނެފައިވަނީ، އޭނާ ވެސް ޓިކްޓޮކަށް ޕޯސްޓު ނުލާންވީ ސަބަބެއް ނެތް ކަމަށެވެ.
"ހެޔޮ ބަސް ބުނުމަށާއި ހެޔޮ ކަންކަމަށް ގޮވާލަން އަހަރެން ޓިކްޓޮކް އައިޑީއެއް ހުޅުވީމެވެ." ޢަބްދުއްރާޒިޤް ބުނެފައިވެއެވެ.
ޢަބްދުއްރާޒިޤް ބުނި ގޮތުގައި އޭނާ ޓިކްޓޮކް އައިޑީއެއް ހުޅުވިތާ އަދި މިވީ އެންމެ 11 ދުވަހެވެ. އަދި މިހާތަނަށް އެންމެ ތިން ވީޑިއޯ ޕޯސްޓު ކޮށްފައިވީ ނަމަވެސް މިހާރުވެސް 2230 ފޮލޯވަރުންނާއި 6300އަށްވުރެ ގިނަ ލައިކްސް އޭނާއަށް ލިބިފައިވެއެވެ.
ޓިކްޓޮކްގައި ޢަބްދުއްރާޒިޤް ޕޯސްޓު ކޮށްފައިވާ އެއް ވީޑިއޯއިން ފެންނަނީ އޭނާ ބަންގި ގޮވަނިކޮށެވެ. އަނެއް ދެ ވީޑިއޯއިން ވެސް ފެންނަނީ މަދަހަ ކިޔަނިކޮށެވެ. ބައެއް މީހުންގެ ފަރާތުން ފާޑުކިޔުން އަމާޒުވިޔަސް، އޭނާގެ ވީޑިއޯތަކަށް ބައެއް މީހުން ތައުރީފު ވެސް ކޮށްފައިވެއެވެ.
ޢަބުދުއްރާޒިޤްއަކީ ކުރިން ބޮޑުބެރުގައި މަޝްހޫރު ނަމެކެވެ. މަދަރުސީ ދައުރުގައި ބޮޑުބެރުގައި ހަރަކާތްތެރިވާން ފަށައި ، އޭގެ ފަހުން ރަޙުމަތްތެރިންނާ އެކު ބޮޑުބެރު ބޭންޑެއް އުފައްދައި އެކަމުގައި އެންމެ އިސް ސަފަށް ދިޔައެވެ. ބޮޑުބެރު ޗެލެންޖްގެ އެންމެ މޮޅު ލަވަކިޔުންތެރިޔާގެ މަޤާމު ދެފަހަރު ހޯދިއެވެ. އޭގެ އިތުރުން އެމްއެންޑީއެފްގައި މަސައްކަތް ކުރިއިރު ވޮއިސް އޮފް އެމްއެންޑީއެފް މުބާރާތުގެ އެއްވަނަ ހޯދިއެވެ.
ނަމަވެސް މިޔުޒިކާއި މަޝްހޫރުކަން އޭނާ ދޫކޮށްލީ، މާތް ވެގެންވާ އިސްލާމްދީނަށްޓަކައެވެ.
''ހިތްހަމަ ޖެހުމެއް ނުލިބޭ ، ދިރިއުޅުމަކަށް ލުޔެއް ނާދޭ ، ފައިސާ ލިބުނަސް ކުލި ނުދެއްކިގެން ވެސް އުޅެންޖެހޭ ، އޭގެ އިތުރުން ދީނަށް ލޯބިކުރާ ޒުވާން ކުދިން އޭރުވެސް ބުނަމުންދޭ ހުއްޓާލަން ، އޭރު ދެން އެމީހުންނާ ޖަދަލުވެސް ކުރެވުނު ، އެކަމާ މިހާރު ދެރަވެސް ވޭ ، އަދި އެމީހުން ކިބައިން މާފަށް އެދެން ވެސް ބޭނުން ، އަދި އަހަރެންގެ ފަރާތުން އެއްވެސް މީހަކާ މެދު ގޯސްކޮށް ކަމެއް ކުރެވިފައި އޮތަސް ، ހިތްހަމަ ނުޖެހޭ ބަހެއް ބުނެފައިއޮތް ނަމަވެސް އެކަމަށް ވެސް މާފަށް އެދެން'' މިޔުޒިކާ ދުރުވި ސަބަބު ކުރިން 'ދެން' އާ ހިއްސާ ކުރަމުން ޢަބްދުއްރާޒިޤް ބުނެފައިވެއެވެ.
ޢަބްދުއްރާޒިޤް އެއިރު ބުނީ އެ ހުރިހާ ސަބަބަކާ އެކު ދީނުގައި އެކަން އޮންނަ ގޮތް ސާފުކުރަން ނިންމި ކަމަށާއި އަދި އެގޮތުން އެކިއެކި ޝައިޚުންނާ ވާހަކަ ދައްކައި މަޢުލޫމާތު އޮޅުން ފިލުވި ކަމަށެވެ. އަދި އެ ހުރިހާ ޝައިޚުންގެ ބަހަކީ ވެސް އެއްބަހެއް ކަމަށާއި އެހެންވެ މިޔުޒިކާއި ދުރުވާން ނިންމީ ކަމަށް ޢަބްދުއްރާޒިޤް ބުނެފައިވެއެވެ.
އޭނާ އެއިރު ވެސް ބުނީ މިޔުޒިކާ ދުރުވި ހިސާބުން ފެށިގެން މަލާމާތާއި ޖެއްސުމުގެ ބަސްތައް ލިބެމުން ދިޔަ ކަމަށާއި ނަމަވެސް އެފަދަ މީހުންނާ މެދު ވެސް އެއްވެސް ހިތްބުރަ ކަމެއް ނެތް ކަމަށެވެ.
މިއިން އެނގޭއެއްޗަކީ ޓިކްޓޮކްގަ އުޅޭމީހުން އެއުޅެނީ އެއީ ހަމައެކަނި ޤާފިލް ކުރާ އެއްޗެއްގެ ވިސްނުމުގައި އެކަން ޤަބޫލުކޮއްގެން ކްމެވެ.