ސިއްރުކުރާ ކޮމިޓީތައް މަޖިލީހުގެ އިދާރާގައި ބޭއްވުމަށް ނިންމައިފި
ރައްޔިތުންގެ މަޖިލީހުގެ ކޮމެޓީތަކުގެ ތެރެއިން ސިއްރުކުރަން ނިންމާކޮމެޓީތައް މީގެ ފަހުން ކުރިއަށް ދާނީ މަޖިލީހުގެ އިދާރާގައި ކަމަށް މަޖިލީހުން ބުނެފިއެވެ.
ކޮވިޑްގެ ހާލަތާ ގުޅިގެން މަޖިލީހުގެ ކޮމެޓީތައް ކުރިއަށް ގެންދަނީ އޮންލައިން ކޮށެވެ. އަދި ކޮމެޓީތައް ޔޫޓިއުބުގައި ވެސް ވަގުތުން ދައްކަމުންދާއިރު، ކޮމެޓީއެއް ސިއްރުކުރާ ނަމަ އެހިސާބުން ޔޫޓިއުބުގައި ކުރިއަށް ގެންދާ ލައިވް ވެސް މެދުކަނޑައިލައެވެ.އެހެން ނަމަވެސް ކޮމެޓީގެ ބައްދަލުވުން އޮންލައިންކޮށް ކުރިއަށް ދެއެވެ.
ސިއްރުކުރާ ކޮމިޓީ ބައްދަލުތައް މަޖިލީހުގެ އިދާރާގައި ބާއްވާ ގޮތަށް ނިންމައިފައި ވަނީ މިމަހުގެ ހަވަނަ ދުވަހު ބޭއްވި ކޮމިޓި ބައްދަލުވުމުގައި ވޯޓު ނެގިގޮތުގެ ސްކްރީން ޝޮޓް ލީކުވުމާ ގުޅިގެންނެވެ. އެ ތަފްސީލް ލީކުވުމާ ގުޅިގެން ކޮމެޓީގެ މެންބަރުންނަށް ވަނީ ބޮޑެތި ފާޑުކިޔުންތަކެއް އަމާޒުވެފައެވެ. އެހެންކަމުން އެފަދަ ކަމެއް ތަކުރާރު ވިޔަ ނުދިނުމަށް އޮންލައިންކޮށް ކުރިއަށް ގެންދާ ބައްދަލުވުންތައް، ސިއްރުކުރަން ކޮމެޓީއަށް ފެނިއްޖެ ނަމަ އެ ކޮމެޓީއެއް މެދުކަނޑާލައި، އެ ބައްދަލުވުން މަޖިލީހުގެ އިދާރާގައި ބާއްވާގޮތަށް މިހާރު ނިންމާފައިވާކަމަށް މަޖިލީހުން ބުނެއެވެ.
އިމްތިޔާޒާއި ސުލޫކީ ކޮމިޓީން މި މަހުގެ ހަވަނަ ދުވަހު ބޭއްވި ބައްދަލުވުމަކީ ރައްޔިތުންގެ މަޖިލީހުގެ އިމްތިޔާޒަށް އަރައިގަތުމުގެ ތުހުމަތުގައި ޑިފެންސް މިނިސްޓްރީގެ ނައިބު ހަސަން ޒަމީލްގެ ދައުވާކުރުމާ ގުޅޭ ގޮތުން ބޭއްވި ބައްދަލުވުމެކެވެ. އެމްޑީޕީ މެމްބަރުންގެ ވޯޓާ އެކީ ވެސް އެ މައްސަލަ ބޭރުކޮށްލެއްވުމުގައި ރައީސް ސޯލިހުގެ ޅިޔަނެއް ކަމަށްވާ އަލިފުށީ ދާއިރާގެ މެންބަރު މުހައްމަދު ރަޝީދު (ބިގޭ)ގެ އަތެއް ވާކަމަށް ބުނެ އެމްޑީޕީގެ ގިނަ މެންބަރުން އަންނަނީ ބިގޭއަށް ވަރަށް ބޮޑަށް ފާޑު ކިޔަމުންނެވެ.
މިކަމާ ގުޅިގެން މަޖިލީހުން ނެރުނު ބަޔާނެއްގައި ވިދާޅުވެފައި ވަނީ އެ ބައްދަލުވުމަކީ ސިއްރު ބައްދަލުވުމަކަށްވާއިރު، އެ ބައްދަލުވުމުގައި ނެގުނު ސްކްރީން ޝޮޓެއް ލީކުވެ، އާއްމުންގެ މެދުގައި ހިޔާލުތަފާތުވެ، އެ ކޮމެޓީގެ މެންބަރުންނަށް އެކި ފަރާތްތަކުގެ އުނދަގުލާއި ފުރައްސާރަ ކުރިމަތިވަމުންދާ ކަމަށެވެ. އަދި އެފަދަ ކަމެއް ކުރިއަށް އޮތްތަނުގައި ވިޔަ ނުދިނުމަށް، ކޮމެޓީ ކުރިއަށް ގެންދާނެ ގޮތަށް ބަދަލުތަކެއް ގެނެވިފައިވާ ކަމަށް ވެސް އެ ބަޔާނުގައި ވެއެވެ.
