ރާއްޖޭގައި ހަރުކަށި ވިސްނުމަށް ރައްކާތެރިކަން ދިނީ ސީދާ އެމްޑީޕީން: ޑރ.ޝަހީމް

ރާއްޖޭގައި ހަރުކަށި ވިސްނުމަށް ރައްކާތެރިކަން ދިނީ ސީދާ އެމްޑީޕީން ކަމަށާއި ވަކި ޖަމާއަތް ހަދައި ނަމާދު ކުރުމުގެ ހައްގު ދޭން ޖެހޭނެ ކަމަށްބުނެ އެކަން ހުއްޓުވަން ހުރަސް އެޅީ އެމްޑީޕީން ކަމަށް ކުރީގެ އިސްލާމިކް މިނިސްޓަރ ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

Ads by STELCO

އުނގޫފާރު ދާއިރާގެ ރައްޔިތުންގެ މަޖިލީހުގެ މެމްބަރު މުހައްމަދު ވަހީދު (ވައްޑޭ) މިއަދު ދެއްކެވި ވާހަކައަކާ ގުޅުވައިގެން ކުރެއްވި ޓްވީޓެއްގައި ޝަހީމް ވިދާޅުވީ މިހާރު ވެސް ސަރުކާރުގެ ޑެޕިއުޓީ މިނިސްޓަރުންގެ ގޮތުގައާއި މަތީ މަގާމުތަކުގައި އައިއެސްއަށް ތާއިދު ކުރައްވާ މީހުން އެބަތިބި ކަމަށެވެ.

”ރާއްޖޭގައި ހަރުކަށި ވިސްނުމަށް ޕްރޮޓެކްޝަން ދިނީ ސީދާ އެމްޑީޕީން. ވަކިން ހެދި ޖަމާއަތްތަކަށް ހައްގު ދޭން ޖެހޭކަމަށް ބުނެ އެކަން ހުއްޓުވުމަށް ހުރަސްއެޅި. މިހާރު ވެސް ސަރުކާރުގެ ޑެޕިއުޓީ މިނިސްޓަރުންގެ ގޮތުގައާއި މަތީ މަގާމުތަކުގައި އައިއެސްއަށް ތާއިދު ކުރާ މީހުން އެބަތިބި” ޑރ. ޝަހީމްގެ ޓްވީޓްގައި ވިދާޅުވިއެވެ.

ޑރ. ޝަހީމް ވިދާޅުވީ އެމްޑީޕީގެ އެއްވެސް ވެރިއަކަށް އަމާޒުކޮށް ލާދީނީ މީހެކޭ ބުނެފައި ނޯންނާނެ ކަމަށާއި އެފަދަ އޯޑިއޯއެއް ނުވަތަ ވީޑިއޯއެއް ދެއްކެވުމަށެވެ. އަދި ދުއާއެއް ކުރި ވާހަކަ އޮންނާނެ ކަމަށާއި އެއީ އަބުރު ދުއްވައިލައި އާއިލާއަށް ކުރިމަތި ކުރުވި ކަންކަމުގެ ނަތީޖާކަމަށް ވެސް ޑރ. ޝަހީމް ވިދާޅުވިއެވެ.

މީގެ އިތުރުން ޑރ ޝަހީމް ވިދާޅުވީ އެމްޑީޕީ އިސްލާހުވުމުން ގައުމު އިސްލާހުވެދާނެ ކަމަށާއި އެހެންކަމުން ދޮގުވާހަކަ ދައްކާ މީހުންނާ މެދު ނަފްރަތު އުފެއްދުން ހުއްޓާލަންވީކަމަށެވެ.

"ކަންނެލި އޮޑި، ފަހަރި، ބޮނަކުއާ، ގޮޅާބޯ، ރާގޮނޑި ރާޖާ. މިއީކޮން ބަޔަކު އުފެއްދި ނަފުރަތު. ތިޔަބޭފުޅުން އިސްލާހުވީމަ ގައުމު އިސްލާހުވެދާނެ. ވީމާ ދޮގު ވާހަކަ ދައްކައި މީހުންނާ މެދު ނަފުރަތު އުފެއްދުން ހުއްޓާލާ" ޑރ. ޝަހީމް ވިދާޅުވިއެވެ.

ޑރ ޝަހީމް ވިދާޅުވީ އެމްޑީޕީން ވަނީ އެތައް ގޮތަކުން އެބޭފުޅާއާ މެދު ނަފުރަތު އުފައްދައި މުސްތަގުބަލު ދުއްވައިލާން މަސައްކަތް ކޮށްފައި ކަމަށެވެ.

ޑރ. ޝަހީމް އިތުރަށް ވިދާޅުވީ އޭނާއަކީ ޓެރެރިސްޓެއްގެ ގޮތުގައި 2010ވަނަ އަހަރު ރައީސް އޮފީހުން ނަން އާއްމުކުރި ކަމަށާއި ބަދުއަހްލާގީ ތުހުމަތު އަޅުވައި ރާއްޖެޓީވީއިން ވެސް އޭނާގެ އަބުރު ކަތިލައިފައިވާކަމަށެވެ. އަދި އާއިލާއާއި ދަރިންނަށް ވެސް އެއްވެސް ހައްގެއްނެތި މަގުމަތިން އުނދަގޫކޮށް ބަދުނާމުކުރި ކަމަށް ވެސް ޑރ. ޝަހީމް ވިދާޅުވިއެވެ.