ފިލިޕީންސް މޮޅުވިޔަނުދީ ރާއްޖެއިން ހިފަހައްޓައިލައިފި
ވޯލްޑްކަޕް އަދި އޭޝިއަންކަޕް ޖޮއިންޓް ކޮލިފައިންގައި ރާއްޖެ އާއި ފިލިޕީންސް ބައްދަލު ކުރި މެޗު 1-1އިން އެެއްވަރު ވެގެން ނިމިއްޖެއެވެ.
މި މެޗުން އެއްވަރު ވުމާއެކު ރާއްޖެ ދެން ވާދަކުރަން ޖެހޭނީ އޭޝިއަން ކަޕްގެ ޕްލޭއޮފް ބުރުގައެވެ.
މިރޭގެ މެޗުން މޮޅުވެގެން ރާއްޖެ ޓީމަށް އޭޝިއަންކަޕްގެ ކޮލިފައިން ގުރޫޕު ސްޓޭޖަށް ދިއުމުގެ ފުރުސަތު އޮތެވެ.އެއީ ކޮލިފައިން ގްރޫޕްގެ ހަތަރު ވަނައިގައި ނިންމި ނަމަވެސް ހުރިހާ ގްރޫޕްތަކުގެ ހަތަރު ވަނައިގައި ނިންމާ ޓީމުތަކުގެ ތެރެއިން ގަދަ ހަތަރެއްގައި ހިމެނިގެންނެވެ. އެހެން ނަމަވެސް މެޗުން އެއްވަރުވުމުން ރާއްޖެއަށް ވަނީ އެ ފުރުސަތު ގެއްލިފައެވެ.
ރާއްޖެ ހިމެނޭ ގުރޫޕު އޭގެ އެއްވަނަ ކަށަވަރު ކޮށްފައި ވަނީ ސީރިއާއިންނެވެ. ސީރިއާއިން އެއްވަނަ ހޯދީ ޖުމުލަ 11 ޕޮއިންޓާއެކުގައެވެ. ރާއްޖެއަށް ގުރޫޕުގެ 4ވަނަ ލިބުނު އިރު ލިބިފައިވަނީ 7 ޕޮއިންޓެވެ. ރާއްޖެ ވަނީ ގުއާމްގެ މައްޗަށް ދެ ފަހަރަށް ކުރި ހޯދައި މިރޭ ފިލިޕީންސްއާ އެއްވަރު ކޮށްފައެވެ. ގުއާމް ގުރޫޕުގެ ފުލުގައި އޮތީ އެއްވެސް ޕޮއިންޓެއް ނުލިބިއެވެ.
ރާއްޖޭގެ ޓީމުން މިރޭގެ މެޗަށް ނުކުތީ ފުރަތަމަ އެގާރައަށް ދެ ބަދަލެއް ގެނެސްގެންނެވެ. އެގޮތުން ކަނާއަތްފަޅި ފަހަތުން އަހުމަދު ނޫމާން (ހެލްމެޓް)ގެ ބަދަލުގައި ހުސެއިން ޝިފާއު (ކުރޯ) އަރުވައިފައިވާއިރު މުހައްމަދު އުމެއިރުގެ ބަދަލުގައި އަލީ ފާސިރު (ސެންޓޭ)އަށް ވަނީ ފުރުސަތު ދީފައެވެ.
މެޗުގައި ގިނަ ވަގުތު ބޯޅަ ހިފަހައްޓައިގެން ކުޅެމުން ދިޔައީ ރާއްޖޭގެ ޓީމުންނެވެ. މެޗުގެ ކުރީކޮޅު ރާއްޖެއިން ފުރުސަތުތަކެއް ވެސް ތަނަވަސް ކުރިއެވެ. ނަމަވެސް މެޗުގެ 18ވަނަ މިނެޓުގައި އެންހެލް ގިރާލްޑޯގެ ގޯލާއެކު ލީޑު ނެގީ ފިލިޕީންސް ޓީމުންނެވެ.އޭނާ އޭރިއާ ބޭރުން ފޮނުވާލި ބޯޅަ ގޯލަށް ވަނީ ފެނު ޖެހިފައި ގޮސް ރާއްޖޭގެ ގޯލްކީޕަރު މުހައްމަދު ފައިސަލް އަތުގައި ޖެހިފައެވެ.
ފިލިޕީންސްއިން ލީޑު ނެގި ނަމަވެސް ރާއްޖޭގެ ޓީމުން ވަނީ ހަ މިނެޓުގެ ތެރޭގައި ސްކޯރ ހަމަހަމަ ކޮށްފައެވެ. މެޗުގެ 25 ވަނަ މިނިޓްގައި ރާއްޖެ އަށް އެއްވަރުކޮށްދިނީ އަލީ ފާސިރު (ސެންޓޭ)އެވެ.
މެޗުގެ ދެވަނަ ހާފުގައި ވެސް ރާއްޖެއިން ވަނީ ގޯލު ޖަހާނެ ފުރުސަތުތައް ތަނަވަސް ކޮށް ރަނގަަޅަށް ކުޅެފައެވެ. މެޗުގެ ފަހު 25 މިނެޓަށް އަލީ އަޝްފާގު (ދަގަނޑޭ) އަރުވައިގެން ގޭމު އަވަސް ކުރަން ރާއްޖެ ޓީމުން މަސައްކަތްތަކެއް ކުރި ނަމަވެސް އެެދެވޭ ނަތީޖާއެއް އެ ބޯޅަތަކަކުން ނެރެވިފައެއް ނުވެއެވެ.
މިއީ ރާއްޖެ އާއި ފިލިޕީންސް ކުޅުނު މެޗެއް އެއްވަރުވި ފުރަތަމަ ފަހަރެވެ. އެންމެ ފުރަތަމަ މި ދެ ޓީމު 2009 ވަނަ އަހަރު ކުޅުނު މެޗުން ރާއްޖެ މޮޅުވި ނަމަވެސް ދެން ކުޅުނު ތިން މެޗުން މޮޅުވީ ފިލިޕީންސްއެވެ.
Ads by STO
