ގެދޮރުވެރިޔާ ލޯނުގެ ގޮތުގައި 170 މިލިއަން ރުފިޔާ ދިނުމަށް ވަނީ ހަމަޖެހިފައި:އަސްލަމް
ގެދޮރުވެރިކަމުގެ ސިޔާސަތުގެ ދަށުން ކުރިއަށް ގެންދާ ގެދޮރުވެރިޔާ ލޯނުގެ އިނީޝިއަލް ފަންޑަށް 170 މިލިއަން ރުފިޔާ ކަނޑައަޅައިފައިވާ ކަމަށް ކަމަށް ހައުސިން މިނިސްޓަރު މުހައްމަދު އަސްލަމް ވިދާޅުވެއްޖެއެވެ.
މިނިސްޓަރު ވިދާޅުވީ މި ސްކީމުގެ ދަށުން ލޯނުގެ ގޮތުގައި 242 މީހަކަށް ލޯނު ދެވޭއިރު، އެންމެ ގިނައިން ލޯނު ދޫކުރުމަށް ހަމަޖެހިފައި ވަނީ 500،000 ރުފިޔާއާއި 700،000 ރުފިޔާއާ ދެމެދުގެ އަދަދެއް ކަމަށެވެ.
މީގެ އިތުރުން 170 މިލިއަން ރުފިޔާއަކީ މި ސްކީމުގެ ދަށުން ލޯނު ދިނުމަށް އިނީޝިއަލް ފަންޑަށް ކަނޑައެޅިފައިވާ ވަރު ނަމަވެސް، ގިނަ ބޭފުޅުން އެ ލޯނު ނަގަން ޝައުގުވެރިކަން ފާޅު ކުރާނަމަ އެއަށް ފައިސާ އިތުރު ކުރާނެ ކަމަށް ވެސް މިނިސްޓަރު ވިދާޅުވިއެވެ. އަދި އެ ފަންޑު ބަލަހައްޓަމުން ދާނީ އެޗްޑީސީން ކަމުގައި މިނިސްޓަރު ފާހަގަ ކުރެއްވިއެވެ.
މިނިސްޓަރު އަސްލަމް ފާހަގަ ކުރެއްވީ 700،000 ރުފިޔާގެ ލޯނަކުން ތިން ކޮޓަރީގެ ގެއެއް އިމާރާތް ކުރެވިދާނެ ކަމަށާއި، އެހެން ނަމަވެސް އެއީ އަމިއްލައަށް ކުރައްވާ ނަމަ ނުވަތަ ރަށުގެ ކޮންޓްރެކްޓަރަކާ ހަވާލުކޮށްގެން ކުރައްވާ ކަމުގައި ވާނަމަ ކަމުގައެވެ. އަދި މާލެއިން ކޮންޓްރެކްޓަރެއް ގެންގޮސްގެން މަސައްކަތް ކުރައްވާ ނަމަ އެއަށް ވުރެ ވެސް ޚަރަދު ކުޑަވެގެންދާނެ ކަމަށް މިނިސްޓަރު ވިދާޅުވިއެވެ.
700،000 ރުފިޔާގެ ލޯނު ނަގާ ކަމުގައިި ވަނީ ނަމަ މަހަކު ޖުމްލަ 5،015 ރުފިޔާ ދައްކަން ޖެހޭނެ ކަމަށާއި އޭގެން 2،015 ރުފިޔާއަކީ އިންޓްރެސްޓް ކަމުގައި ވެސް މިނިސްޓަރ އަސްލަމް ވިދާޅުވިއެވެ. އެއީ ހަ އިންސައްތަ އިންޓްރެސްޓެވެ. 20 އަހަރުން ލޯނު ދައްކައި ނިންމާނަމަ ޖުމުލަ 1.2 މިލިއަން ރުފިޔާ ދައްކަން ޖެހޭނެ ކަމުގައި ވެސް މިނިސްޓަރު ފާހަގަ ކުރެއްވިއެވެ.
