ކުޑަކުއްޖެއްގެ ފުރާނަ ދުއްވައިލުމަކީ މުޅި ޤައުމު ކަރުނަ އަޅަންޖެހޭކަމެއް: ޖެންޑާ މިނިސްޓަރ
ލޯތްބާއި، އަޅައިލުމާ އެކު ރައްކާތެރިކަމުގައި ބޮޑުވުމުގެ ހައްގު ލިބިފައިވާ ކުޑަކުއްޖެއްގެ ފުރާނަ ގަސްދުގައި ދުއްވައިލުމަކީ މުޅި ޤައުމު ކަރުނަ އަޅަން ޖެހޭވަރުގެ ކަމެއް ކަމަށް މިނިސްޓަރ އޮފް ޖެންޑަރ ފެމިލީ އެންޑް ސޯޝަލް ސާވިސަސް އާއިޝަތު މުހައްމަދު ދީދީ ވިދާޅުވެއްޖެއެވެ.
މީގެ ދެ ދުވަސް ކުރިން (20 ޖޫން 2021)ގައި ކުއްޖަކު ރަހީނު ކުރި ކަމުގެ ރިޕޯޓް ފުލުހުންނަށް ލިބިގެން މައްސަލަ ބަލަމުން ދަނިކޮށް ރޭ 02:38 ގައި އެކުއްޖާ މަރައިލައިފައި އޮއްވާ ފެނުނު ކުއްޖާގެ މައްސަލައަށް އިޝާރާތް ކުރައްވައި ޖެންޑާ މިނިސްޓަރ ވިދާޅުވީ ކުޑަކުދިންގެ ރައްކާތެރިކަން ކަށަވަރުކުރުމަށް ޓަކައި ސަރުކާރުން ކުރަމުން އަންނަ މަސައްކަތުގައި ކުރިމަތިވާ ގިނަ ގޮންޖެހުންތައް ނައްތާލުމަށް ޓަކައި މުއައްސަސާތައް ގުޅިގެން ކުރެވޭ މަސައްކަތް މިހާރަށް ވުރެ ބަދަހިވެ ވަރުގަދަވާން ޖެހޭ ކަމަށެވެ.
"މި ހިތާމަވެރި ދަނޑިވަޅުގައި ކުއްޖާގެ ޢާއިލާއަށް ތައުޒިޔާ ކިޔައި، ކުއްޖާގެ ފުރާނައަށް ރަޙްމަތް ލައްވައި ސުވަރުގޭގެ ދާއިމީ ނިޢުމަތް މިންވަރުކޮށްދެއްވުމަށް އެދޭ ޙާލު، ޢާއިލާއަށް ކެތްތެރިކަން ދެއްވުން އެދި މާތް ﷲގެ ހަޟްރަތުގައި ދުޢާ ދަންނަވަން." މިނިސްޓަރގެ ޓްވީޓްގައި ވިދާޅުވިއެވެ.
"ދެން"އަށް މަޢުލޫމާތު ލިބިފައިވާ ރޭ މަރައިލައިފައި އޮއްވާ ފެނުނު ކުއްޖާގެ ހަށިގަނޑު ފެނިފައި ވަނީ ހުޅުމާލޭ ފޭސް 2 ސަރަހައްދުން މޫދުންނެވެ. އަދި މިކުއްޖާގެ ހަށިގަނޑު އޮތީ ފޮއްޓަކަށް ލައިފައި ކަމަށް މަޢުލޫމާތު ލިބެއެވެ. މިހާރު އެކުއްޖާގެ ހަށިގަނޑު ވަނީ އައިޖީއެމް ހޮސްޕިޓަލަށް ގެންގޮސްފައެވެ. އެކުއްޖާ ފެނުނުއިރު ހަށިގަނޑު އޮތީ ވަރަށް ބޮޑަށް ކުނިވެފައި ކަމަށް މަންޒަރު ދުށް ފަރާތަކުން "ދެން"އަށް ވަނީ ބުނެފައެވެ.
