ބޮލީވުޑް ސްކްރީން: ރަޝްމިކާގެ ފޭނެއް އޭނައާ ބައްދަލު ކުރުމަށް 900ކިލޯ މީޓަރު ކަނޑައްތުކޮށްފި
ބޮލީވުޑްގެ ޚަބަރުތަކަށް ކުރު ގޮތަކަށް ބަލައިލާއިރު ރާކީއާއި ކަރީނާ އަދި ރަޝްމިކާގެ ވާހަކަތައް ފާހަގަކޮށްލެވެއެވެ.
ފުރަތަމަ ރާކީ ސާވަންތުގެ ވާހަކައިން ފަށާނަމެވެ.
ރާކީ ސާވަންތު ބޭނުން ވަނީ ފިރިމީހާއަށް ލަނޑެއް ދޭން ބިގްބޮސްއަށް ފޮނުވަން
އިންޑިއާގެ މަޝްހޫރު އައިޓަމް ގާރލް ރާކީ ސާވަންތަކީ އެތައް ގޮތަކަށް ގިނަ މީހުން މުނިފޫހިފިލުވައިދޭ ފަންނާނެކެވެ. މިދިޔަ އަހަރު ބިގްބޮސް 14 ގައި ވެސް ބައިވެރިވި ރާކީ ދާދި ފަހުން ބުނެފައި ވަނީ މިފަހަރު ބިގްބޮސް 15 އަށް އޭނާގެ ފިރިމީހާ ރިތޭޝް ފޮނުވަން ބޭނުންވާ ކަމަށެވެ.
"އަހަރެން ބޭނުން އޭނައަށް އިހުސާސުވާން އަހަންނަށް ކުރިމަތިވީ ކަންތައްތައް. ކާކުތަ އެގޮތަށް އަމިއްލަ އަނބިމީހާ ދުރަށްލައިފައި ބަހައްޓާނީ؟" ރާކީ ބުނެފައިވެއެވެ.
މީގެ އިތުރުން ރާކީ ބުނީ ރިތޭޝް ބިގްބޮސްއަށް ގޮސްފިނަމަ، ރާކީ އުޅެނީ ކައިވެނި ކޮށްގެންކަމަށް ޝައްކުކޮށް އޭނާ ހަދަނީ ދޮގު ކަމަށް ބުނާ މީހުންނަށް އެއީ ދޮގެއް ނޫންކަން ވެސް އެނގޭނެ ކަމަށެވެ. އަދި ސަލްމާން ޚާންއާއި ބިގްބޮސް ބޭނުން ނަމަ ރިތޭޝްއާ އެކު ރާކީ ވެސް ބިގްބޮސް 15 ގައި ބައިވެރިވެދާނެ ކަމަށް ވެސް ބުންޏެވެ.
ރަޝްމިކާގެ ފޭނެއް: 900 ކިލޯމީޓަރަށް ދަތުރުކޮށްފައި އޭނައާ ބައްދަލު ކުރަން ގޮސްފި
އެކްޓްރެސް ރަޝްމިކާ މަންޑަނާ އާންމުންގެ ތެރޭގައި މަޝްހޫރުކަން ހޯދީ ޓެލޫގޫ ފިލްމުތަކުންނެވެ. ސްޕައި ތުރިލާރެއް ކަމުގައިވާ "މިޝަން މަޖްނޫ"ގެ މަސައްކަތް ނިމުމުން ބޮލީވުޑަށް ވެސް ތައާރަފްވުމުގެ މަގުމަތީގައި ހުރި ރަޝްމިކާގެ ފޭނުން މިހާރު ވެސް މަދެއް ނޫނެވެ. އިންޑިއާގެ އެކި އަވަށުގައި އޭނާގެ ފޭނުންތައް އިންތިހާއަށް ގިނަކަމުން އޭނާއަށް ވަނީ "ނޭޝަނަލް ކްރަޝް އޮފް އިންޑިއާ"ގެ ލަގަބު ވެސް ދީފައެވެ.
ފޭނުންގެ ވާހަކަ ދައްކާއިރު ދާދި ފަހުން އޭނާގެ ފޭނެއް މިވަނީ މީހަކު ހީވެސް ނުކުރާފަދަ ކަމެއް ކޮށްފައެވެ. އެގޮތުން ރަޝްމިކާ ކޮޑާގޫގައި އޭނާގެ ގޭގައި ހުއްޓާ އެ މީހާ ވަނީ އޭނާއާ ބައްދަލުކޮށްފައެވެ. ލިބުނު ސިހުމާއެކީ އިތުރަށް ބަލައިލުމުން އެނގުނީ އެމީހާ އައީ 900 ކިލޯމީޓަރުގެ ދިގު ދަތުރެއް ކޮށްފައި ކަމެވެ.
އާކާޝް ތުރިޕާޓީ ނަމަކަށް ކިޔައި އެމީހާ ބުނި ގޮތުގައި ރަޝްމިކާ ދިރިއުޅޭ ތަން އޭނާ ހޯދީ ގޫގްލް މެޕް މެދުވެރިކޮށެވެ. އެއަށްފަހު އޭނާ ފުރަތަމަ ދިޔައީ ރޭލެއްގައި މައިސޫރަށް ކަމަށާއި ކާގޯ އޮޓޯއެއްގައި ކޮޑާގޫ ކައިރީގައި އޮންނަ މުގުލާއަށް ދިޔަ ކަމަށް ވެސް ބުންޏެވެ. އޭނާ އުޅުނު ގޮތުން މީހުންނަށް ޝައްކުވެ ފުލުހުންނަށް އެންގި ކަމަށާއި ފުލުހުން އޭނާ ކައިރީ އަނބުރާ އޭނާގެ އަވަށް ކަމުގައިވާ ޓެލަންގާއަށް ދިޔުމަށް ނަސޭހަތްތެރިވި ކަމަށް ވެސް ބުންޏެވެ. ނަމަވެސް ކޮޑާގޫ ފުރަބަންދުން ނެގުމާ އެކު އާކާޝް ވަނީ ރަޝްމިކާއާ ބައްދަލު ކޮށްފައެވެ.
ކަރީނާ މިފަހަރު "ޑޭޓެއް" ހެދީ ދަރިފުޅު ތައިމޫރްއާ އެކު
ކަރީނާ ކަޕޫރް ޚާން ދާދި ފަހުން މިވަނީ އޭނާ ބުނާ ގޮތުން ނަމަ "ޑޭޓެއް" ހަދައިފައެވެ. ނަމަވެސް އޭނާ މިފަހަރު ޑޭޓެއް ހެދީ ދޮށީ ދަރިފުޅު ތައިމޫރް އަލީ ޚާންއާ އެކު ކަމަށް ވެސް ކަރީނާ ބުންޏެވެ.
އެންމެ ގާތް އެއް އެކުވެރިޔާ އަދި ޕްރޮޑިއުސަރު ރިއާ ކަޕޫރް ފޮނުވި އައިސް ކްރީމް ބޮމުން ކަރީނާ ވަނީ އޭނާގެ ދަރިފުޅާއެކު ފިލްމެއް ބަލައި އުފާވެރި ވަގުތުކޮޅެއް ހޭދަކޮށްފައެވެ. އެކަން އިންސްޓަގްރާމްގައި ހިއްސާ ކުރަމުން، ރިއާއަށް ޝުކުރު އަދާ ކޮށްފައި ކަރީނާ ބުނީ އޭނާއާއި ތައިމޫރް ތިބީ ފިލްމެއް ބަލަމުން ޑޭޓެއްގައި ކަމަށެވެ.
