ރެސްޓޯރެންޓް ހުޅުވާ ގަޑިތައް އިތުރުކޮށް، ފިހާރަތައް އާއްމު އުސޫލުން ހުޅުވުމުގެ ހުއްދަ ދީފި
ރޭގަނޑު 11:30 ވަންދެން ކެފޭ،ރެސްޓޯރެންޓްތައް ހުޅުވައިފައި ބެހެއްޓުމުގެ ހުއްދަ ދީފިއެވެ.
މިހާރު ކުރިޔަށްދާ ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާން މުހައްމަދު މަބްރޫކް ވިދާޅުވީ މާދަމާއިން ފެށިގެން ރެސްޓޯރެންޓުތަކާއި ކެފޭތަކަށް ރޭގަނޑު 11:30 ވަންދެން ޑައިންއިންގެ ޚިދުމަތް ދެވޭ ގޮތަށް ހުޅުވައިލާށާއި އާންމު އުސޫލެކޭ އެއްގޮތަށް ފިހާރަތަކުގެ ގަޑިތަކަށް ބަދަލު ގެންނަން ނިންމަވައިފައިވާ ކަމަށެވެ.
މީގެ އިތުރުން ޑެލިވަރީގެ ހިދުމަތް 24 ގަޑިއިރު ދެވޭނެ ކަމަށާއި ރޭގަނޑު ޑެލިވަރީގެ ހިދުމަތް ދޭން ހުއްދައެއް ބޭނުން ނުވާނެ ކަމަށެވެ. ފިހާރަ އަދި ރެސްޓޯރެންޓުތައް ހުޅުވައިލަން ނިންމައިފައި ވީނަމަވެސް އެޗްޕީއޭގެ ގަވާއިދާ އެއްގޮތައް އަމަލު ކުރެއްވުމަށް މަބްރޫކް ވަނީ އިލްތިމާސްކޮށްފައެވެ.
“ރެސްޓޯރެންޓުތަކާއި ކެފޭތައް ހުޅުވާލަން ނިންމާފައި ވީނަމަވެސް ގައިދުރުކަން ބެހެއްޓުމަށާއި އެޗްޕީއޭގެ ގަވާއިދާ އެއްގޮތަށް އަމަލު ކުރެއްވުމަށް އިލްތިމާސްކުރަން” މަބްރޫކް ވިދާޅުވިއެވެ.
ކޮވިޑް-19 ކޮންޓްރޯލް ކުރުމަށް މިހާރު ރާއްޖޭގައި އަޅައިފައިވާ ފިޔަވަޅުތަކަށް ދޭ އިތުރު ލުއިތައް މިހާރު އިއުލާންކޮށްފައިވާއިރު އޭގެ ތެރޭގައި ކަރަންޓީންވުމަކާ ނުލައި ދެކުނު އޭޝިއާގެ ޤައުމުތަކުން ރިސޯޓްތަކަށް އެތެރެވުމުގެ ހުއްދަ ދިނުމާއި، މާލެ ސަރަޙައްދުގައި ހިނގަމުން އައި ކާފިއު ވަގުތު އުވައިލުން ހިމެނެއެވެ.
