އެމްޑީޕީ މެންބަރަކު ރައީސްގެ އިސްތިއުފާއަށް ގޮވުމުން ރާއީ ރަތަށް

ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިޙް އިސްތިއުފާއަށް ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑޭ) ގޮވައިލެއްވުމުން މަކުނުދޫ ދާއިރާގެ މެމްބަރު މުހައްމަދު ރާއީ ހިތްހަމަނުޖެހުން ފާޅު ކުރައްވައި ބޮންޑޭއަށް ފިޔަވަޅު އެޅުމަށް ގޮވައިލައްވައިފިއެވެ.

Ads by STELCO

ރައީސްގެ އިސްތިއުފާއަށް ބޮންޑޭ ގޮވައިލެއްވުމުން ހިތްހަމަނުޖެހުން ފާޅު ކުރައްވައި ރާއީ ވިދާޅުވީ 65 މެމްބަރުން ވަރަށް ބަައިވަރު ކަންކަން ކޮށްފި ކަމަށާއި މެމްބަރުން ކުރެއްވި މަސައްކަތުން މެމްބަރުން ހީރޯއިންނަށްވާ ވަރުގެ މަސައްކަތް ވެސް ކޮށްފިކަމަށެވެ. އަދި ވަކި ކަމެއް ނުވުމުން މެމްބަރުން ޒީރޯއަށް ހަދައިލުން ކަމުނުދާކަމަށް ވެސް ރާއީ ވިދާޅުވިއެވެ.

"އަޅުގަނޑުމެންގެ 65 މެމްބަރުން ކުރާ މަސައްކަތް ވަރަށް ބަައިވަރު ކަންކަން ކޮށްފިން. ހީރޯއިންނަށް ހަދައިލި ކަންކަން ކޮށްފިން. އެކަމަކު ވަކި ކަމެއްނު ވީމައި މިމީހުން ޒީރޯއިންނަށް ހަދާލީމައި ކަމަކު ނުދޭ." ރާއީ ވިދާޅުވިއެވެ.

މެމްބަރު ރާއީ ވިދާޅުވީ އެމްޑީޕީ މެމްބަރެއް ރައީސުލް ޖުމްހޫރިއްޔާ އިސްތިއުފާއަށް ގޮވުމުން އެމްޑީޕީތެރޭން ބޮންޑޭއަށް ފިޔަވަޅު އަޅަން ޖެހޭނެކަމަށެވެ. މީގެއިތުރުން މިއަދަކީ ރަައީސްގެ އިސްތިއުފާއަށް ގޮވަން ޖެހޭނެ ދުވަހެއް ނޫން ކަމަށާއި މިއަދަކީ މިއަށް ވުރެ ބަދަހިކޮށް ޓެރަރިޒަމާ ދެކޮޅަށް މަސައްކަތް ކުރަންޖެހޭ ދުވަސްކަމަށް ރާއީ ވިދާޅުވިއެވެ.

"މިއަދު އަޅުގަނޑު ދުށިން އަޅުގަނޑުމެންގެ މެމްބަރެއް މާފަންނު މެދު ދާއިރާގެ އިއްޒަތްތެރި މެމްބަރު ރަޝީދު ރައީސުލް ޖުމްހޫރިއްޔާގެ އިސްތިއުފާއަށް ގޮވާލީ އެމްޑީޕީތެރޭން ފިޔަވަޅު އަޅަންޖެހޭނެ އެމަނިކުފާނާ މެދު، މިއަދަކީ އަޅުގަނޑުމެން ރަައީސްގެ އިސްތިއުފާއަށް ގޮވަން ޖެހޭނެ ދުވަހެއް ނޫން. މިއަދަކީ މިއަށް ވުރެ ބަދަހިކޮށް ޓެރަރިޒަމާ ދެކޮޅަށް މަސައްކަތް ކުރަން ޖެހޭ ދުވަސް" ރާއީ ވިދާޅުވިއެވެ.

މީގެ އިތުރުން ވެސް އެމްޑީޕީގެ މަޖިލީސް މެމްބަރުން އެކުވެރިވެ އެއްބަައިވަންތަވާން ޖެހޭ ކަމަށާއި ކަންކަން ކުރެވޭނީ އެގޮތަށް މަސައްކަތް ކޮށްގެން ކަމަށް ވެސް މެމްބަރު ރާއީ ވިދާޅުވިއެވެ.

ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހްގެ ކިބައިގައި ވެރިކަން ކުރެއްވުމުގެ "ގަޓް" ނެތް ކަމަށް ވިދާޅުވެ ކެބިނެޓް އުވައިލާ މަގާމުން އިސްތިއުފާ ދެއްވުމަށް ބޮންޑޭ ވަނީ ގޮވައިލައްވައިފައެވެ. ނަފުރަތުގެ ބިލް ހުށަހަޅައި އެ ބިލް އަބުރާ ކޮމިޓީއަށް ފޮނުވައިލާން ނިންމެވުމަށް އިޝާރާތްކޮށް ބޮންޑެ ވިދާޅުވީ އެ ވަރުގެ ކަމެއް ކޮށްފައި ފަހަތަށް ޖެހުމުން ވެސް ރައީސުލްޖުމްހޫރިއްޔާ އިސްތިއުފާ ދޭން ޖެހޭކަމަށެވެ.