މަރު ކޮމިޝަނުން މިހާރު ކުރާހާ ވެސް މަސައްކަތަކީ ފޫ ނެތް ފަޔަކަށް ފެން ފުރުން: އުމަރު
ގޮތް ނޭނގޭ މަރުތަކާއި ވީނުވީއެއް ނޭނގި ގެއްލިފައިވާ މީހުންގެ މައްސަލަތައް ބެލުމަށް އުފައްދަވައިފައިވާ ރިޔާސީ ކޮމިޝަނުން މިހާރު ކުރާހާ ވެސް މަސައްކަތަކީ ފޫ ނެެތް ފަޔަކަށް ފެން ފުރުން ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
މިނިވަން ނޫސްވެރިޔާ އަހުމަދު ރިލްވާން ގެއްލުވައިލި މައްސަލައިގައި ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް އެ ކޮމިޝަނަށް ހާޒިރު ކުރުމާ ގުޅިގެން އޮންލައިން ނޫހަކަށް މައުލޫމާތު ދެއްވަމުން އުމަރު ވިދާޅުވީ، ރައީސް ޔާމީންގެ ވެރިކަމުގައި އެ ފަދަ މައްސަލަތައް ތަހުގީގު ކުރައްވައިފައި ވަނީ ވަރަށް ފުރިހަމައަށް ކަމަށާއި އެހެން ކަމުން މަރު ކޮމިޝަނަށް އަލަށް ކުރެވޭނެ އެއްވެސް ތަހުގީގެއް ނޯންނާނެ ކަމަށެވެ.
"ރިލްވާނުގެ މައްސަލައަކީ ހުރިހާ އެވިޑެންސެއް ހޯދައި ތަހުގީގު ކުރެވިފައި އޮތް މައްސަލައެއް. އެހެންވީމާ އަލަކަށް ކުރެވޭނެ ތަހުގީގެއް ނޯންނާނެ، މި ބޭފުޅުން ވެރިކަމަށް އައިސް ބައްލަވާލެއްވީމާ އެނގޭނެ އަޅުގަނޑުމެން ހުރިހާކަމެއް ކޮށްފައިވާކަން. މި މީހުން އަލަށް ފުރޮޅާނެ ގަލެއް ނެތްކަން އެނގޭނެ" އުމަރު ނަސީރު ވިދާޅުވެފައިވެއެވެ.
މީގެ އިތުރުން އުމަރު ވިދާޅުވީ މި ސަރުކާރުން ވެރިކަމަށް އައީ ރިލްވާން ގެއްލުނު މައްސަލަ ވެސް ވިއްކާލައިގެން ކަމަށާއި އެއީ އެއްވެސް ގޮތަކަށް ކޮށްގެން ވާނެ ކަމެއް ނޫން ކަމަށެވެ.
Ads by STO
